hindu, media, religion, sanjog news, vichar valonun

આ દિવાળીએ ફૂટી રહ્યા છે કેટલાક પ્રશ્નોરૂપી ફટાકડા!

(વિચારવલોણું કૉલમ, સંજોગ ન્યૂઝ, દિ.૪/૧૧/૧૮)

બે દિવસ પછી દિવાળી છે. આ દિવાળીએ શું ફટાકડા ઓછા ફૂટશે? ફટાકડા ફૂટશે તો સરકારી સમયની અંદર જ ફૂટશે? કેરળમાં સબરીમાલા પર સર્વોચ્ચ ન્યાયાલયના ચુકાદાની સામે આંદોલન કરી રહેલા ભાજપની સરકાર ગુજરાતમાં ફટાકડા પર સર્વોચ્ચ ન્યાયાલયના ચુકાદાનો અમલ ચુસ્ત રીતે કરાવશે?

પ્રશ્નો અનેક છે. શું માત્ર નવરાત્રિ પર જ લાઉડસ્પીકરનો ઘોંઘાટ પ્રદૂષણ અને માનસિક ત્રાસ ફેલાવે છે? અનેક મસ્જિદો પર એક સાથે દિવસમાં પાંચ વાર બેસૂરા અવાજમાં પોકારાતી બાંગથી પ્રદૂષણ અને માનસિક ત્રાસ નથી ફેલાતો? શું માત્ર ફટાકડાથી જ પ્રદૂષણ થાય છે? શું માત્ર દિવાળીએ જ આ આદેશનો ચુસ્તીથી અમલ થશે? નાતાલ અને ૩૧મી ડિસેમ્બરે રાત્રે આટલી ચુસ્તીથી અમલ થશે? દિવાળીએ તો લોકો સંયમિત રીતે ફટાકડા ફોડતા હોય છે. પરંતુ નાતાલ અને ૩૧મીએ છાકટા થઈને પૂરા મદમસ્ત થઈને ફટાકડા ફોડશે ત્યારે? બે વર્ષ પહેલાં ૩૧મી ડિસેમ્બરે બેંગ્લુરુમાં રાત્રે છોકરીઓની અને મહિલાઓની ભયંકર છેડતી થઈ હતી…પોલીસની ભરપૂર હાજરી હોવા છતાં. તો પછી ફટાકડા તો શું ચીજ છે?

જો ફટાકડા ફોડવાનું કોઈ હિન્દુ શાસ્ત્રોમાં નથી લખ્યું તો, ૩૧મી ડિસેમ્બરે છાકટા થવાનું, ફાર્મ હાઉસમાં દેશી-વિદેશી કૉલ ગર્લ બોલાવવાનું કે સૉફિસ્ટિકેટેડ હૉટલમાં બૅલે ડાન્સર બોલાવવાનું, દારૂ-માંસની જ્યાફત ઉડાવવાનું બાઇબલમાં લખ્યું છે? બકરી ઈદ પર બકરીને તડપાવી તડપાવીને મારવી કે પછી એક ઝાટકે મારવી તેવું કુર્આનની કઈ આયાત કહે છે? (કુર્આનની આયાત ૨૨:૩૭ તો કહે છે કે “તેનું માંસ અલ્લાહ સુધી નહીં પહોંચે અને ન તો તેનું લોહી, પરંતુ જે તેમની પાસે પહોંચશે તે છે તારી ભક્તિ.”)

રામમંદિરના કેસની સુનાવણી કરવા માટે સમય નથી પરંતુ ફટાકડાના કેસ, સબરીમાલાના કેસમાં ઝડપથી સુનાવણી થઈને ચુકાદા આવી જાય છે. આવું કેમ? બળાત્કારના આરોપી આસારામને જામીન નથી મળતા પરંતુ કેરળના બિશપ ફ્રાન્કો મુલક્કલને જામીન મળી જાય છે. આવું કેમ? (બંને કેસમાં ટૅક્નિકલ કારણો હશે જ જેના કારણે જ કૉર્ટે જામીન નહીં આપ્યા અથવા આપ્યા હશે, પરંતુ સામાન્ય લોકોને આ પ્રશ્ન થઈ રહ્યો છે.) આ બિશપને જામીન મળી ગયા પછી તેનું કેરળમાં ભવ્ય સ્વાગત થાય છે. આસારામના સમાચારોથી પાનાં ને પાનાં ભરી દેનારા અખબારો બિશપના સમાચાર કાં તો છાપતા જ નથી અથવા અંદરના પાને ખૂણામાં બે કૉલમમાં છાપી દે છે. આસારામ કેસમાં અમૃત પ્રજાપતિની હત્યા વખતે જેટલો હોબાળો મચ્યો હતો તેટલો હોબાળો બિશપ વિરુદ્ધ જુબાની આપનાર ફાધર કુરિયાકૉઝ મૃત મળી આવે છે તે સમાચાર પર નથી મચતો. ટીવી પર સાધુ કે શૈતાન જેવા અપર બૅન્ડ સાથે સામાન્ય લોકોના અચેતન મગજમાં સતત હિન્દુ સંતો બળાત્કારી, લંપટ અને વ્યભિચારી હોય છે તેવું ઠસાવતી ચેનલોએ બિશપના સમાચાર વિશે કેટલો સમય ફાળવ્યો? જેની ‘દયાની દેવી’ની છબી ઉપસાવી દેવાઈ તેવાં મધર ટેરેસાના ટ્રસ્ટની ખ્રિસ્તી નનો બાળકો વેચતાં પકડાઈ તેના વિશે મિડિયાએ કેટલી જગ્યા અથવા પ્રાઇમ ટાઇમનો સ્લૉટ ફાળવ્યો?

જૈન નમ્ર મુનિ પર બળાત્કારનો ખોટો આક્ષેપ થાય કે કોઈ જૈન મુનિ સંસારમાં પાછા ફરે ત્યારે સમાચાર ચેનલો અને અખબારોમાં તે સમાચારને જેટલું સ્થાન મળે છે તેટલું સ્થાન કોઈ મૌલવી બળાત્કારનો દોષિત ઠરે ત્યારે પણ મળે છે? (આરોપ લાગે ત્યારે તો નથી જ મળતું.) કોઈ સ્વામીનારાયણના સાધુનું કથિત દુષ્કૃત્યમાં નામ આવે ત્યારે જે રીતે અખબારો અને ટીવી ચેનલો મંડી પડે છે તે ચર્ચોમાં પાદરીઓના સજાતીય સંબંધો કે નનોના શારીરિક શોષણ અંગેના સમાચાર બતાવે છે? રોમન કેથોલિક ખ્રિસ્તીઓના સર્વોચ્ચ વડા પૉપ ફ્રાન્સિસે ગત જાન્યુઆરી ૨૦૧૮માં નાના છોકરાઓના શારીરિક શોષણ કરી રહેલા પાદરીની સાથે ‘સાક્ષી’ રહેલા ચીલી દેશના બિશપનો બચાવ કરેલો તે સમાચાર તમારી પાસે પહોંચ્યા ખરા?

સુપ્રીમ કૉર્ટ પર પાછા ફરીએ. તાજેતરમાં સજાતીય સંબંધોની કલમ હટાવી દેવાઈ. વ્યભિચાર પરની કલમ ૪૯૭ હટાવી દેવાઈ. સજાતીય સંબંધ કે વ્યભિચાર ગુનો નથી તેવું કહેવાયું. બીજી તરફ, દિવાળીના દિવસે રાત્રે માત્ર આઠથી દસ વચ્ચે જ ફટાકડા ફોડવા તેવું કહ્યું. તે પછીના સમયમાં ફટાકડા ફોડાશે તો શું સજા થશે? સબરીમાલા મંદિરમાં માસિક ધર્મમાં હોય તે ઉંમરની સ્ત્રીઓના દર્શન પર પ્રતિબંધ સર્વોચ્ચ ન્યાયાલયે દૂર કરાવ્યો. પરંતુ જે સ્ત્રીઓએ અરજી કરી છે તેને હિન્દુ ધર્મ સાથે લેવાદેવા છે ખરી? ઇન્ડિયન યંગ લૉયર્સના વડા નૌશાદ અહેમદ ખાન છે જેણે અરજી કરી છે. જોકે સિફતપૂર્વક અરજીકર્તાઓનાં નામો ચાર હિન્દુ સ્ત્રીઓનાં જ જણાય છે.

ટીવી પર સબરીમાલાની ડિબેટ ચાલતી હોય ત્યારે પેનલમાં બિનહિન્દુ સ્ત્રીઓને બેસાડી દેવાય છે. તેઓ હિન્દુ સ્ત્રીઓને માસિક ધર્મમાં હોય તો પણ મંદિરમાં જઈ શકે તેવી દલીલ કરતી હોય છે. પરંતુ એ અલગ વાત છે કે તેમના પોતાના પંથમાં સ્ત્રીઓને ઉપાસના સ્થાનમાં જવાની છૂટ નથી હોતી. ટીવી સમાચાર ચેનલો આવી બિનહિન્દુ સ્ત્રીઓને ઈરાદાપૂર્વક બોલાવે છે?

લવ જિહાદની માન્યતાને સમર્થન આપનારા અનેક કિસ્સા મળી રહે છે, પરંતુ આનાથી વિપરીત વલણ જેવા કિસ્સામાં, હિન્દુ યુવક સાથે લિવ ઇન રિલેશનશિપમાં રહેનારી મુસ્લિમ રેહાના ફાતિમા સબરીમાલામાં ધરાર જવા માગે છે. તે પોતાનાં ઉપાસના સ્થળોમાં સ્ત્રીઓને પ્રવેશ માટે ચળવળ નથી ચલાવતી, પરંતુ તેને હિન્દુ ધર્મસ્થાનમાં પરંપરાને અને શ્રદ્ધાને તોડવી છે. હિન્દુ સ્ત્રીઓમાં શ્રદ્ધાળુ અને અશ્રદ્ધાળુ એવા ભાગલા પડાવવા છે. રેહાના મંદિરમાં સેનિટરી પેડ લઈને જવા માગે છે. તેને અટકાવવામાં આવે છે. આ રીતે તે હિન્દુ મહિલાઓને, જેમને તેમના પરિવારમાં તાર્કિક રીતે શિક્ષણ નથી મળતું કે તેઓ અપવિત્ર નથી, પરંતુ સ્વચ્છતાના નિયમના કારણે સબરીમાલા જેવા કેટલાંક મંદિરમાં જ દર્શન માટે નથી જઈ શકતી, તેમને ઉશ્કેરે છે. રેહાના ફાતિમા સામે હોબાળો કરવાના બદલે માધ્યમો કેન્દ્રીય પ્રધાન સ્મૃતિ ઈરાનીની ટીપ્પણીને ટ્વિસ્ટ કરીને હોબાળો કરે છે. સ્મૃતિ ઈરાનીએ એવું કહ્યું હતું કે તમે કોઈ બહેનપણીના ઘરે જાવ ત્યારે સેનિટરી પેડ લઈને જાવ છો? પરંતુ માધ્યમો ઈરાદાપૂર્વક એવા સમાચાર ફેલાવે છે કે સ્મૃતિ ઈરાનીએ મહિલાઓને માસિક ધર્મમાં હોય ત્યારે ઘરમાં જ બેસી રહેવા સલાહ આપી.

આ રેહાના ફાતિમા એ જ છે જેણે ‘કિસ ઑફ લવ’ના નામે જાહેરમાં અભદ્રતા (તેને પ્રેમ બિલકુલ ન જ કહેવાય)ની ઝુંબેશ ચલાવેલી. આ રેહાના ફાતિમા એ જ છે જેણે એક પ્રૉફેસરે અંગ પ્રદર્શન ન થાય તેવાં કપડાં પહેરવા કૉલેજની વિદ્યાર્થિનીઓને (કૉલેજ એ મૉડેલિંગ કરવાનું રૅમ્પ નથી. કેટલાક લોકો દલીલ કરશે કે સ્ત્રીએ કેવાં કપડાં પહેરવાં તે બીજાં કેવી રીતે નક્કી કરી શકે? જોકે આવી હાઇફાઇ સૉસાયટીવાળા પાછા પેજ થ્રી પાર્ટી રાખશે ત્યારે ચોક્કસ પ્રકારના કપડાં પહેરીને જ આવવું તેવા ડ્રેસ કૉડ રાખશે.) સલાહ આપી તો રેહાનાએ તરબૂચ સાથે ટૉપલેસ ફોટા પડાવ્યા. રેહાના ફિલ્મમાં ન્યૂડ સીન પણ આપી ચૂકી છે. મજાની વાત એ છે કે સેક્યુલર મિડિયામાં રેહાનાને ભક્ત (ડિવોટી) અને એક્ટિવિસ્ટ તરીકેનાં વિશેષણોથી સંબોધાય છે.

મોદી સરકારમાં કેરળના એક ખ્રિસ્તી પ્રધાન કે. જે. આલ્ફૉન્ઝે સબરીમાલા અંગે કહ્યું છે, “જે ખ્રિસ્તી છોકરી ચર્ચમાં પણ નથી જતી, જે મુસ્લિમ છોકરી મસ્જિદમાં માનતી નથી, તેઓ સબરીમાલામાં જવા માગે છે.” અચાનક મુસ્લિમ અને ખ્રિસ્તી યુવતીને ભગવાન અયપ્પામાં કેમ શ્રદ્ધા જાગી ગઈ?

‘બિગ બૉસ’માં દર વર્ષે પૉર્ન સ્ટાર કે ગૅ જેવા લોકોને કેમ લવાય છે? તે પ્રશ્ન પણ જાગે છે. અનુપ જલોટા અને જસલીન મથારુના કથિત પ્રેમના કિસ્સા અને તેને તમામ ભજનગાયકો સાથે જોડી દેવામાં આવે છે. જે રમૂજો સર્જાય છે તેમાં એવો અર્થ નીકળે છે કે ભજનગાયકો કરતાં પૉપ સિંગરો સારા. એ જ અનુપ જલોટા ‘બિગ બૉસ’માંથી હકાલપટ્ટી પામ્યા પછી ઘટસ્ફોટ કરે છે, “જસલીને મને કહ્યું હતું કે બિગ બૉસ તરફથી ફરજિયાત કહેવાયું હતું કે તે એક વિચિત્ર જોડી તરીકે જ જઈ શકે છે. (મતલબ કે જસલીને કોઈ એવી જોડી બનાવવી પડે કે જેનાથી દેશભરમાં ચકચાર મચે. આ જોડી લેસ્બિયનની હોઈ શકતી હતી, યા તો તેના કોઈ ગે પુરુષ સાથીની હોઈ શકતી હતી કે પછી અનુપ જલોટા જેવા ઘરડા વ્યક્તિની હોઈ શકતી હતી.) તમે મારા મેન્ટર છો. તમે ચાલો ને. તો મેં તેની અને તેના પિતાની વાત માની લીધી.”

‘બિગ બૉસ’માં જે પ્રેમાલાપો થાય છે તે મોટા ભાગે પબ્લિસિટી સ્ટંટ જ હોય છે? અનુપમા ચોપરા-આર્યન વૈદ્ય, પાયલ રોહતગી-રાહુલ મહાજન, વીણા મલિક-અસ્મિત પટેલ, ગૌહર ખાન-કુશાલ ટંડન, તનીષા મુખર્જી-અરમાન કોહલી, સારા ખાન-અલી મર્ચન્ટ, ગૌતમ ગુલાટી-ડાયાન્ડ્રા સોઅર્સ જેવાં દરેક સીઝનમાં મુખ્ય રૂપે ચર્ચિત યુગલો સીઝન પૂરી થયાં પછી છૂટાં પડી ગયા છે તેથી આવો પ્રશ્ન થાય છે.

આ બધું ‘કલ્ચરલ માર્ક્સિઝમ’ અથવા કહો કે ‘કલ્ચરલ ટેરરિઝમ’ના વિકૃત સિદ્ધાંત પર ચાલીને હિન્દુ સમાજને જ લક્ષિત કરાતું હોવાની છાપ પ્રથમ દૃષ્ટિએ ઉપસે છે.

ગુજરાત સહિત દેશભરમાં અનેક મહત્ત્વનાં મંદિરોનો વહીવટ સરકારોના હાથમાં છે, પરંતુ અન્ય પંથોનાં દેવસ્થાનો વિશે આવું નથી. આવું કેમ? અને કેરળમાં તો સામ્યવાદી સરકારે મંદિરોનો વહીવટ કરતા દેવસ્વોમ બૉર્ડમાં બિનહિન્દુને બૉર્ડના અધ્યક્ષ (કમિશનર) તરીકે મૂકવાની હિલચાલ કરેલી પરંતુ ભાજપના રાજ્ય પ્રમુખ પી. એસ. શ્રીધરને કેરળ ઉચ્ચ ન્યાયાલયમાં અરજી કરતાં હાઇ કૉર્ટે કહ્યું કે માત્ર હિન્દુ જ બૉર્ડના અધ્યક્ષ બની શકે. ડાબેરી સરકારની આ બદમાશીને કેટલાં મિડિયાએ ઉજાગર કરી?

કેરળમાં હાઇ કૉર્ટે બીજો એક મહત્ત્વનો આદેશ આપ્યો. તેણે સબરીમાલા અંગે પોલીસને ચેતવણી આપી કે લોકોની (હિન્દુ શ્રદ્ધાળુઓ વાંચો)ની ભાવના સાથે ચેડા ન કરો. હિંસામાં સીધા સંડોવાયેલા હોય તેમની જ ધરપકડ કરો. ભીમા કોરેગાંવ કેસમાં સર્વોચ્ચના ન્યાયમૂર્તિ કહે કે સરકાર સામે અસંતોષ એ તો લોકશાહી માટે સૅફ્ટી વાલ્વ છે તો તેને અત્યંત મહત્ત્વ આપનારા મિડિયાએ કેરળ હાઇ કૉર્ટના ઉપરોક્ત બંને ચુકાદાને કેટલું મહત્ત્વ આપ્યું? પૂણેની કૉર્ટે માઓવાદીઓ સાથે સંબંધ ધરાવનારા ઉપરોક્ત એક્ટિવિસ્ટોની જામીન અરજી ફગાવી દીધી અને કહ્યું કે પોલીસે એકઠા કરેલા પુરાવા આ એક્ટિવિસ્ટોના માઓવાદીઓ સાથેના સંબંધો દર્શાવે છે, તે સમાચારને મિડિયાએ કેટલું પ્રાધાન્ય આપ્યું?

પંજાબમાં ગત જૂન મહિનામાં ૨૩ મૃત્યુ ડ્રગ્ઝના લીધે થયા. ગુજરાતમાં સ્વાઇન ફ્લુના લીધે થતાં મૃત્યુના સમાચાર યથાર્થ રીતે બતાવાય છે પરંતુ શું ડ્રગ્ઝના લીધે આટલાં મૃત્યુ થયાં તે સમાચાર નોંધ લેવાને પણ લાયક નહોતા? પંજાબમાં અમૃતસર પાસે ટ્રેન અકસ્માતમાં નવજોતસિંહ સિદ્ધુ અને તેમનાં પત્ની નવજોત કૌરનાં જૂઠાણાં વિડિયોમાં પકડાઈ ગયા. આયોજક નવજોત કૌરની ચમચાગીરી કરતાં કહે છે કે “પાંચસો ટ્રેન ચાલી જશે તો પણ પાંચ હજારથી વધુ લોકો તમારી રાહ જોતાં ટ્રેક પર ઊભા હશે.” અને સિદ્ધુ આ અકસ્માતને ભગવાનનો પ્રકોપ ગણાવે તેવા અકસ્માતમાં મૃત્યુ પામેલાઓના પરિવારજનોના ઘા પર નમક ભભરાવતા નિવેદનનું ત્રિપુરાના મુખ્યપ્રધાન વિપ્લવ દેવનાં નિવેદનોને મળતા મહત્ત્વ જેટલું મહત્ત્વ પણ નહીં?

હમણાં સરદાર સરોવર ડેમ પાસે સ્ટેચ્યૂ ઑફ યૂનિટીના ખર્ચની સામે પ્રશ્નો ઉઠાવાયા પરંતુ કોઈએ કર્ણાટકમાં બી. ઝેડ. ઝમીર અહેમદ ખાન નામના કૉંગ્રેસી પ્રધાને એક રૅસ્ટૉરન્ટમાં ટિપ તરીકે રૂ. ૨૫,૦૦૦ આપ્યા તે સમાચાર ‘કોના બાપની દિવાળી’ કે ‘કોના બાપની ઈદ’ના હેડિંગને લાયક ન ગણાય? આ કર્ણાટકમાં જ કૉંગ્રેસી પ્રધાન ડી. કે. શિવકુમારે (જેમના રિસૉર્ટમાં ગુજરાતના કૉંગ્રેસી ધારાસભ્યો રાજ્યસભાની ચૂંટણી વખતે ‘એન્જૉય’ કરવા ગયા હતા) પોતાના જ પક્ષની જૂની સરકારના લિંગાયતોને લઘુમતીનો દરજ્જો દેવાના નિર્ણયને ‘મોટી ભૂલ’ ગણાવ્યો અને માફી માગી જેના લીધે ત્યાં હોબાળો થઈ ગયો. આ સમાચાર તમારા સુધી પહોંચ્યા ખરા?

આ દિવાળીના તહેવારોમાં ઉપરોક્ત પ્રશ્નોરૂપી ફટાકડાઓ હિન્દુઓના મનમાં ધડાધડ ફૂટી રહ્યા છે. સરકાર, મિડિયા, કૉર્ટ- આ ત્રણેય-લોકશાહીના આધારસ્તંભો જો ફટાકડાઓને ઓલવી નહીં નાખે તો આ ફટાકડાઓ મોટો વિસ્ફોટ કરી શકે છે.

Advertisements
international, media, sarvottam karkirdee margadarshan, terrorism

ટ્રમ્પનો મુસ્લિમ દેશો પર વિઝા પ્રતિબંધ: પાડાના વાંકે પખાલીને ડામ કેમ?

(સર્વોત્તમ કારકિર્દી માર્ગદર્શનના માર્ચ ૨૦૧૭ના અંકમાં ‘સાંપ્રત’ કૉલમમાં આ લેખ છપાયો.)

કોઈ દેશમાં કોને આવવા દેવા અને કોને નહીં તે નક્કી કરવાની સત્તા કોને? જે તે દેશના વડાને. કોઈ દેશમાં અમુક વ્યક્તિઓ ગેરકાયદે અથવા કાયદે આવીને પછી ત્રાસવાદી પ્રવૃત્તિ કરે તો તેમને રોકવા જોઈએ કે નહીં? બિલકુલ રોકવા જોઈએ. કોઈ વ્યક્તિ ચૂંટણીમાં વચન આપે કે તે ચૂંટણી જીતશે તો ત્રાસવાદી પ્રવૃત્તિને ઉત્તેજન આપતા દેશોના લોકોને આવતા રોકશે તો તે ખોટું છે? જરા પણ નહીં. અને જો આવી વ્યક્તિ ચૂંટણી જીતી જાય તો તેણે વચન પાળવું જોઈએ કે નહીં? પાળવું જ જોઈએ ને. ન પાળે તો? તો તેની પાછળ વિરોધીઓ પડી જાય, દેશનું અને વિદેશનું મિડિયા પડી જાય.

હવે તમે જ કહો, અમેરિકા પ્રમુખ ડોનાલ્ડ ટ્રમ્પે સત્તા સંભાળતા વેંત પોતાનું વચન નિભાવ્યું અને સાત ઇસ્લામિક દેશના લોકોને પોતાના દેશમાં આવતા રોક્યા તેમાં તો આખી દુનિયામાં તેમના પર થૂ-થૂ થઈ ગયું. અમેરિકા તો સ્થળાંતરિતો (ઇમિગ્રન્ટો)નો જ દેશ છે અને અમેરિકાની જે કંઈ પ્રગતિ થઈ છે તે સ્થળાંતરિતોને જ આભારી છે તેવો પ્રચાર શરૂ થઈ ગયો. ટ્વિટરની નવી એપ આવી છે –  પેરિસ્કોપ. આ એપ પર જે કોઈ વપરાશકારો હોય તે પોતાનો વિડિયો લાઇવ બતાવે છે, વાતચીત કરે છે. માત્ર ગમ્મત માટેની આ એપ નથી. તેના પર ટ્રમ્પ અને અમેરિકાની મુલાકાતે આવેલાં બ્રિટનનાં વડાં પ્રધાન થેરેસા મેની સંયુક્ત પત્રકાર પરિષદને જીવંત બતાવાય. આ એપ ખોલો એટલે સીધું વંચાય- ‘પ્રાઉડલી મેડ ઇન અમેરિકા બાય ઇમિગ્રન્ટ્સ’

હવે આ એવી વાત થઈ કે ઘરમાં કોઈ છોકરું તોફાન કરે અને તેને વઢો તો ઘરના અન્ય તમામ લોકો પોતાના માથે લઈ લે કે તમે અમને તોફાની કહ્યા. ટ્રમ્પનો વિરોધ ઇમિગ્રન્ટ સામે નથી. પરંતુ જે લોકો અમેરિકામાં ગેરકાયદે કે કાયદે ઘૂસી અમેરિકામાં ત્રાસવાદી પ્રવૃત્તિઓ કરે કે ગુંડાગર્દી કરે છે તેની સામે છે.

હવે એ વાત સ્પષ્ટ છે કે ત્રાસવાદી પ્રવૃત્તિ કોણ કરે છે? ત્રાસવાદી સંગઠનો કયા પંથના છે? અલ કાયદા, ઇસ્લામિક સ્ટેટ ઑફ ઈરાક એન્ડ સિરિયા (આઈએસઆઈએસ), લશ્કર-એ-તોઇબા, જમાત ઉદ દાવા, હમાસ, ઇન્ડિયન મુજાહિદ્દીન…આ બધાં સંગઠનોનો હેતુ શું છે? પશ્ચિમી દેશો અને ભારત સહિત તમામ દુનિયામાં ઇસ્લામિક શાસન સ્થાપવું. શરિયાનો કાયદો લાગુ કરવો. માની લઈએ કે આ ત્રાસવાદીઓને એવું ભરમાવવામાં આવ્યું છે કે ભારતમાં તેમના મુસ્લિમ ભાઈઓ અને બહેનો પર બહુ અત્યાચારો થાય છે. માનો કે તેમના મનમાં ઠસાવવામાં આવ્યું છે કે પશ્ચિમી દેશો મુસ્લિમો પર જુલ્મ કરે છે. તેમની સંસ્કૃતિ વિકૃતિ ફેલાવનારી છે. પરંતુ રશિયાના ચેચન્યામાં ત્રાસવાદી પ્રવૃત્તિ થવાનું કારણ? રશિયા તો સામ્યવાદી દેશ છે. સામ્યવાદ કોઈ ધર્મ- કોઈ પંથમાં માનતો નથી. ચીન સામ્યવાદી દેશ છે. તો પછી ચીનમાં પણ ઇસ્લામિક ત્રાસવાદ કેમ પ્રવેશ્યો? ચીનમાં શિનજિયાંગ પ્રાંતને અલગ દેશ કરવાની ચળવળ ત્યાંના મુસ્લિમો કેમ ચલાવે છે? ત્યાં ઉઇઘુર મુસ્લિમોએ તુર્કીસ્તાન ઇસ્લામિક પાર્ટી કેમ સ્થાપી છે? ચીને ત્યાં રમઝાન દરમિયાન રોજા રાખવા પર કેમ પ્રતિબંધ મૂકવો પડ્યો?

ટ્રમ્પ સાત ઇસ્લામિક દેશોના લોકો અમેરિકામાં આવવા પર પ્રતિબંધ મૂકે તો કહેવાતા ઉદારવાદીઓ દેકારો મચાવે છે પરંતુ ચીન તેના દેશમાં ગેરકાયદે ત્રાસવાદીઓ આવી જાય કે ત્રાસવાદી કૃત્ય કરીને દેશ છોડીને ભાગી ન જાય તે માટે પાકિસ્તાન તેનું ખાસ મિત્ર (ભારતને દબાવવા માટે) હોવા છતાં તેની સાથેની સરહદે સુરક્ષા ચુસ્ત બનાવવા નિર્ણય કરે તો વિદેશના તો છોડો, ભારતનું મિડિયા તેની વ્યવસ્થિત નોંધ પણ ન લે. દરેક લેખમાં રાષ્ટ્રવાદી-હિન્દુવાદીઓને ગાળો ભાંડતા બુદ્ધુજીવી કૉલમિસ્ટો તેના પર લખે પણ નહીં! એ બતાવે છે કે ભારતના મિડિયામાં કહેવાતા ઉદારવાદીના નામે  ત્રાસવાદને પોષક અને સમર્થક પત્રકારો-કૉલમિસ્ટો ઘૂસી ગયા છે.

અરે ભાઈ! સેક્યુલરિઝમ ખરા અર્થમાં તો એ કહેવાય કે ગમે તે પંથમાં ખોટું ચાલતું હોય તો તેને તમે વખોડો. તેને બહાર લાવો. જયશ્રીગીરી સાધ્વીના વેશમાં ગોરખધંધા કરતી હોય તો તેના વિશે લખવાની સાથે કેરળમાં ખ્રિસ્તી સાધવીઓના ફાધર દ્વારા શોષણની વાતો પણ લખો. કેથોલિક ચર્ચે વર્ષ ૨૦૧૫માં પોતાના શોષણ સામે અવાજ ઉઠાવનાર એક નનને રૂ. ૧૨ લાખ તેને ‘સેટલ થવા’ (ખરેખર તો મોઢું બંધ કરવા) માટે આપ્યા તે સમાચાર કયા અખબારમાં તમે વાંચ્યા? કઈ ટીવી ચેનલે તેના પર આસારામની જેમ રોજેરોજ ચર્ચાઓ ચલાવી? બીજનોરની જામા મસ્જિદનો ઈમામ એક મહિલાને શેતાનમાંથી છૂટકારો અપાવવાના બહાને તેના પર બળાત્કાર કરે તે ઘટના ગયા વર્ષના ઑગસ્ટની છે. સુરતમાં ૩૨ વર્ષના મૌલવીએ ૧૫ વર્ષની બાળા પર બળાત્કાર કર્યો તે ઘટના બે વર્ષ પહેલાંની છે. આ ઘટનાઓ કયા છાપામાં તમે વાંચી? ચાલો, આ ઘટનાઓ તો જૂની છે, પરંતુ રાજસ્થાનના બાડમેર જિલ્લામાં બાયતની મદરેસામાં રહેતો એક મૌલવી બકરી પર બળાત્કાર કરતા પકડાયો! આ ઘટનાઓ  છાપામાં આવી? તેના પર રોજેરોજ કઈ ચેનલ પર ચર્ચાઓ થઈ?

રશિયા-ચીનની વાત પછી જર્મનીની કરીએ. જર્મની સહિત યુરોપના દેશોએ સિરિયા, અફઘાનિસ્તાનના લોકોને દયા ખાઈને શરણ આપ્યું છે. પરંતુ ત્યાં શું સ્થિતિ છે? યુકેના ઇન્ડિપેન્ડન્ટ સમાચારપત્રના અહેવાલ મુજબ, વર્ષ ૨૦૧૫ની ૩૧ ડિસેમ્બરે જર્મનીના કૉલોન (Cologne)માં ૧,૨૦૦ સ્ત્રીઓ પર ૨,૦૦૦ પુરુષો, જેમાંના મોટા ભાગના શરણાર્થી હતા, તેમણે બળાત્કાર કરવા કોશિશ કરી. ૫૦૦ જણાના ટોળા પર ફટાકડા ફેંકવામાં આવ્યા. એક મહિલા અંડરકવર પોલીસ અધિકારીના પેન્ટમાં હાથ નાખીને તેની છેડતી કરવામાં આવી. મહિલાઓના કપડાં ફાડી નખાયાં. એક મહિલાના જેકેટમાં ફટાકડો નખાયો. બેંગ્લુરુમાં આ ૩૧ ડિસેમ્બરે છેડતી થઈ તેના સમાચાર આપણા મિડિયાએ ગાઈવગાડીને બતાવ્યા પરંતુ જર્મનીના આ સમાચારની નોંધ પણ લીધી?

સિરિયામાં પ્રમુખને પદચ્યુત કરવા માટે અમેરિકાની પૂર્વેની ઓબામા સરકારના ટેકાથી આઈએસઆઈએસ અને ત્યાંના બળવાખોરો યુદ્ધ કરે અને તેના કારણે ઘણા નિર્દોષ મરાય તેનાથી કોઈ પણ સંવેદનશીન વ્યક્તિને નિર્દોષો પ્રત્યે અનુકંપા જાગે તે સ્વાભાવિક છે. તેમાં ઐલાન કુર્દી નામનું એક નિર્દોષ બાળક યુરોપમાં શરણ લેવાના પ્રયાસમાં દરિયાની લહેરોમાં મરીને તેનો દેહ તણાઈને તુર્કીના રિસોર્ટના બીચ પર આવે અને તે ફોટો આખા દેશમાં અનુકંપા જગાવી જાય તે તાર્કિક છે પરંતુ સાથે જે લોકો ત્રાસવાદી વિચારધારાનો બચાવ કરે છે તેમણે એ સમજવું રહ્યું કે સિરિયામાં મુસ્લિમો જ મુસ્લિમો સામે લડે છે. આવું યમનમાં પણ છે, તુર્કીમાં પણ છે, ઈરાકમાં પણ છે, અફઘાનિસ્તાનમાં પણ છે અને ઈસ્લામનાં મક્કા-મદીના જેવાં પવિત્ર સ્થાનો જ્યાં છે તે સાઉદી અરેબિયામાં પણ છે. તો શું શરિયાનું શાસન સ્થપાવાથી શાંતિ સ્થપાઈ જવાની? મુસ્લિમો પર અત્યાચારો બંધ થઈ જવાના? જો તેમ જ હોત તો શરિયાના કાયદા જ્યાં ચુસ્ત રીતે લાગુ છે તેવા ઇસ્લામિક દેશોમાં આ ત્રાસવાદી સંગઠનો કેમ હુમલા કરે છે? પાકિસ્તાન તો મુસ્લિમોને ભારતમાં અન્યાય થશે તેમ માનીને જ ઝીણા અને તેના મુસ્લિમ સમર્થકોએ સ્થાપ્યો હતો ને? તો ત્યાં પણ સિંધમાં સૂફી દરગાહ અને તે અગાઉ અનેક મસ્જિદો પર કેમ બૉમ્બ ધડાકા થાય છે?

ઉદારવાદીઓએ આંખ-કાન ખુલ્લાં રાખીને એ પણ સ્વીકારવું રહ્યું કે આ શરણાર્થીઓ યુરોપના દેશો માટે સમસ્યા બની રહ્યા છે. બધા નહીં તોય ઘણા બધા શરણાર્થીઓએ ત્યાં કાયદા અને વ્યવસ્થાની પરિસ્થિતિ બગાડી છે. પેલી કહેવતની જેમ તેઓ ‘પેટમાં ગરીને પગ પહોળા કરી રહ્યા છે’. એકલા જર્મનીમાં જ ૧૭ હજાર શરણાર્થીઓએ પોતાને પૂર્ણ કદનો શરણાર્થીનો દરજ્જો મળે તે માટે જર્મન સરકાર સામે દાવો કર્યો હતો અને તેમાં જીત મેળવી છે. જે જર્મની આ શરણાર્થીઓને શરણ આપે છે ત્યાં બર્લિનમાં ગત ૧૯ ડિસેમ્બરે ટ્રક ડ્રાઇવરે બરાબર ખ્રિસ્તી તહેવાર ક્રિસમસ પહેલાં ટ્રક ચલાવીને ૧૨ લોકોને મારી નાખ્યા અને ૫૬ લોકોને ઘાયલ કર્યા. પેલા બાળકની તસવીર પરથી અનુકંપા થતી હોય તો આ ૧૨ લોકોને મારી નાખ્યા તેના પર ઉદારવાદીઓને અનુકંપા નથી થતી? હુમલાખોર શરણ માગનાર ટ્યુનિશિયાનો રહેવાસી જ હતો.

અને માત્ર ટ્રમ્પની વાત શું કામ કરો છો? રોયલ ઇન્સ્ટિટ્યૂટ ઑફ ઇન્ટરનેશનલ એફેર્સના એક સર્વેક્ષણ મુજબ, પૉલેન્ડ, ઑસ્ટ્રિયા, હંગેરી, ફ્રાન્સ અને બેલ્જિયમ સહિત દસ દેશોમાં હવે મુસ્લિમોને પ્રવેશ આપવા સામે વિરોધ વધી રહ્યો છે. આ તો માનો કે ખ્રિસ્તી પ્રભાવી દેશો છે, પરંતુ તાજેતરમાં સાઉદી અરેબિયા જેવા કટ્ટર ઇસ્લામિક દેશોએ પાકિસ્તાનના ૩૯ હજાર નાગરિકોને કાઢી મૂક્યા તેની નોંધ ભલે મિડિયાએ બહુ સારી રીતે નહીં લીધી હોય, પરંતુ તેના સૂચિતાર્થ સમજવા જેવા છે. વિઝા નિયમોના ઉલ્લંઘન કરતાંય આ નાગરિકો આઈએસઆઈએસ નામના ત્રાસવાદી સંગઠન સાથે સંકળાયેલા હોવાની આશંકા પર આ પગલું ભરવામાં આવ્યું છે.

કુવૈત જેવા ઇસ્લામિક દેશે તો વર્ષ ૨૦૧૧માં અને વર્ષ ૨૦૧૬માં અફઘાનિસ્તાન, સિરિયા, યમન, ઈરાક, ઈરાન અને હા, બુદ્ધુજીવી-ઉદારવાદીઓના માનીતા પાકિસ્તાન તેમજ બાંગ્લાદેશના નાગરિકોના પ્રવેશ પર પ્રતિબંધ મૂક્યો છે અને આ વર્ષેય મૂક્યો છે. એ તો ઠીક, પણ આ ઉદારવાદીઓના માનીતા પાકિસ્તાને ગયા જુલાઈથી આ ફેબ્રુઆરી સુધીમાં છ લાખ અફઘાનીઓને અફઘાન પાછા મોકલ્યા. આ શરણાર્થીઓએ પોતાની વિતક કથામાં કહ્યું છે કે પાકિસ્તાની પોલીસે તેમના પર અનહદ અત્યાચારો ગુજાર્યા હતા અને ખંડણી ઉઘરાવી હતી. તેમનાં બાળકોને શાળામાંથી કાઢઈ મૂકવામાં આવતા. કેમ્પમાં શાળા ચાલતી તેને બંધ કરી દેવામાં આવતી. (કાશ્મીરના નિર્વાસિત પંડિતોની સાથે તો તેમના જ દેશની શિબિરોમાં આવું થતું) સામે પક્ષે પાકિસ્તાન પોલીસ આ અફઘાનીઓને પોતાના દેશની સુરક્ષા માટે ખતરો માનતી હતી. તેથી તેણે આ પગલું લીધું, પરંતુ બુરહાન વાનીને મારવામાં આવે તો માનવ અધિકાર ભંગના નામે ચિલ્લંચિલ્લી કરતા બરખા દત્તો, રાજદીપ સરદેસાઈઓ, શેખર ગુપ્તાઓનાં મોઢાં આવા મામલે સિવાઈ જાય છે!

ભારતમાં એક ચર્ચનું છાપરું ઉડી જાય તો પણ આપણું મિડિયા અને અમેરિકાની વિવિધ એજન્સીઓ, ત્યાંના ઉદારવાદી (તત્કાલીન) પ્રમુખ બરાક ઓબામા ભારતને સહિષ્ણુતાના પાઠ ભણાવવા લાગે છે પરંતુ ચીન દક્ષિણ કોરિયાના ૩૨ ખ્રિસ્તી મિશનરીઓને કાઢી મૂકે ત્યારે આ બધા મૂંગામંતર થઈને બેસી જાય છે. ચીને આ મિશનરીઓને કાયદાનું પાલન ન કરવા અને સ્થાનિક રીતરિવાજોને માન ન આપવા માટે આ પગલું ભર્યું હતું.

પણ આપણું મિડિયા અને અમેરિકા સહિત વિશ્વનું ઉદારવાદી મિડિયા ત્રાસવાદીઓ- સેવાના નામે વટાળ પ્રવૃત્તિ કરતા ખ્રિસ્તી મિશનરીઓ પ્રત્યે સહાનુભૂતિ ધરાવે છે, તેથી જે તેનો વિરોધ કરે તેને રાઇટિસ્ટ (જમણેરી), ફેનેટિક (ધર્માંધ), ઑટોક્રેટિક અથવા ફાસિસ્ટ (સરમુખત્યાર), સ્ટબૉર્ન (હઠીલું), જડસુ વગેરે વિશેષણોથી બુદ્ધુજીવી કૉલમિસ્ટો નવાજશે પરંતુ આ સત્ય લખતાં તેમની કલમમાંથી શાહી સૂકાઈ જશે. દયાનંદ સરસ્વતી, રાજા રામમોહનરાયે જેમ હિન્દુ ધર્મની કુરીતિઓ સામે અવાજ ઉઠાવ્યો, જેમ અત્યારે પણ હિન્દુઓ ગોડસે વગેરે હિંસક પ્રવૃત્તિ કરનારને જાહેરમાં તિરસ્કૃત કરે છે તેમ હકીકતે તો મુસ્લિમોએ જ તેમના પંથને બદનામ કરનારા સંગઠનો સામે મેદાનમાં આવવું પડશે. નહીંતર પાડાના વાંકે પખાલીને ડામ ખમવા તૈયાર રહેવું પડશે.

hindu, national

શેરોન સ્ટોન જેવી હસ્તીઓને કઈ ઇન્સ્ટિન્ક્ટ ભારત ખેંચી લાવે છે?

શેરોન સ્ટોન ભારતની પાંચ દિવસની મુલાકાતે આવી ગઈ. શેરોન સ્ટોન કોણ છે તે સોશિયલ મિડિયાના જાણકાર લોકોને કહેવાની જરૂર નથી. પાંચ દિવસની ભારતની મુલાકાત દરમિયાન શેરોન સ્ટોન મુંબઈ આવી, રાજસ્થાન ફરી, અભિષેક-ઐશ્વર્યાને મળી, અનેક કાર્યક્રમો કર્યા. તેમાં વારાણસી પણ ગઈ. ગંગા નદીના ઘાટે પૂજા કરી, આરતી કરી.

sharon stone in varanasi 2013

sharon stone in varanasi 2013-2sharon stone in varanasi 2013-3sharon stone in varanasi 2013-5શેરોન સ્ટોન એ પહેલી સ્ટાર નથી કે વિદેશી હસ્તી નથી જેને હિન્દુ ધર્મ કે હિન્દુત્વ  પ્રત્યે આકર્ષણ થયું હોય. દલીલ કરવા ખાતર, કોઈ એવી દલીલ કરી શકે કે ભારત ફરવા આવી હતી અને એમાં વારાણસી ગઈ ને ત્યાં પૂજા કરાવી. પરંતુ એમાં તથ્ય નથી. ફરવું હોય તો ફરી શકાય. ‘ઇન્ડિયા’માં  ‘ફરવા ને ચરવા લાયક’ ઘણું છે. પરંતુ તેમાં તે વારાણસી જઈને પદ્ધતિસર પૂજા કરાવે તે નોંધપાત્ર બિના એટલા માટે બને છે કે તે હોલિવૂડથી આવે છે…એવા વાતાવરણમાંથી જ્યાં નર્યો ‘ભોગ’ અથવા તો ‘Eat, Drink and ****’ નો જ મહિમા છે. એવું જીવન જે પ્રાણીઓ પણ નથી જીવતા. પ્રાણીઓ પણ કુદરતી રીતે જ જીવન જીવે છે.

કહેવાય છે કે ગ્લેમર વર્લ્ડ અથવા ચકાચૌંધ અથવા મોહમાયાની દુનિયામાં જઈને બધું ભૂલી જવાય છે. રૂપાળી દુનિયામાં રૂપાળા દેખાવું, મોંઘા અને સુંદર કપડાં પહેરવા, જૂતાં પહેરવાં, ભારે મેકઅપ કરવો, સારું પર્ફ્યૂમ છાંટવું, કાર ને હેલિકોપ્ટરમાં પ્રવાસ કરવો, મોટી મોટી હસ્તીઓ સાથે યેનકેન પ્રકારેણ સારા સંબંધો રાખવા કે દેખાડવા, મોટી હોટલોમાં પાર્ટી કરવી…અને આ બધા માટે કમાણીનું ચક્કર… આ બધામાંથી પછી ચમચાગીરી, દગાખોરી અને ઝઘડાનું ચક્કર ચાલુ થાય છે જેમાં જાણતા અજાણતા ખૂંપતા જવાય છે. આ ‘સ્ટ્રીટ ઓફ નો રિટર્ન’ છે. જો મજબૂત મનોબળના રહ્યા કે પછી સફળતા મળી તો ટકી ગયા અને નબળા મનના રહ્યા તો આત્મહત્યા સુધીની નોબત આવી ગઈ કે પછી છેલ્લે ઓળખી પણ ન શકાય તેવી ગૂમનામીભરી હાલતમાં મૃત્યુ. નફીસા જોસેફ, કુલજીત રંધાવા, વિવેકા બાબાજી, સિલ્ક સ્મિતા, જીયા ખાન, અનેક ઉદાહરણો છે. આ દુનિયા એવી હોય છે જેમાં તમને આધ્યાત્મિક લાગણી પણ એટલી જ થઈ આવવાની શક્યતા છે. બધું ભોગવી લીધા પછી કંઈ બાકી રહેતું ન લાગે અને એટલે ચાલુ થાય ઈશ્વરની શોધ.

એક થિયરી (જેમ કે રજનીશની) છે જેમાં બધું ભોગવવાની વાત આવે છે અને પછી કોઈ ઈચ્છા જ બાકી રહેતી ન લાગે  ને ઈશ્વરભક્તિમાં જ આનંદ આવે. પશ્ચિમની જે દુનિયા છે, તેમાં મોટા ભાગે આવું જ થાય છે.  શેરોન સ્ટોન જે ફિલ્મમાં કામ કરીને ચર્ચામાં આવી ગઈ હતી તે ‘બેઝિક ઇન્સ્ટિન્ક્ટ’નો શબ્દ પકડીએ તો ‘બેઝિક ઇન્સ્ટિન્ક્ટ’ જ આખરે માણસને સાચી ‘ઇન્સ્ટિન્ક્ટ’ (ઈચ્છા, પ્રકૃત્તિ, સહજ જ્ઞાન) તરફ દોરી જાય છે. અને એટલે જ કદાચ પશ્ચિમનું જગત ભલે, હંમેશ માટે નહીં તો પણ વારે તહેવારે મૂળભૂત જ્ઞાન જેમાં રહેલું છે તેવા હિન્દુત્વ તરફ મીટ માંડે છે. એની કેટલીક તસવીરી ઝલક આ રહી:

જુલિયા રોબર્ટ્સ
‘પ્રેટિ વૂમન’ ફેમ અભિનેત્રી જુલિયા રોબર્ટ્સ હિન્દુ ધર્મથી માત્ર આકર્ષિત જ નથી થઈ, બલકે તેણે હિન્દુ ધર્મ અપનાવી લીધો અને કારણ આપ્યું કે આધ્યાત્મિક સમાધાન કે સંતોષ માત્ર હિન્દુ ધર્મમાં જ મળે છે
Samantha Cameron-wife of british prime minister3
બ્રિટનના વડા પ્રધાન ડેવિડ કેમેરોનનાં પત્ની સામન્થા કેમેરોન ૨૦૧૩ની દિવાળીની ઉજવણી દરમિયાન

પણ સવાલ એ છે કે આખી દુનિયાને ભારત તરફ જ્યારે આશા જાગતી હોય ત્યારે ભારતનું કેવું વરવું ચિત્ર ઉપસી રહ્યું છે? ભારતને મહદ્ંશે, હવે ‘ઇન્ડિયા’ તરીકે સંબોધાય છે. ‘ઇન્ડિયા’ નામ અંગ્રેજોએ પાડેલું છે અને અંગ્રેજો જે શિક્ષણ પદ્ધતિ, જે સંસ્કૃતિ છોડતા ગયા છે તે તે પછી ઉત્તરોત્તર વધતી ચાલી છે. ખાસ કરીને ઇન્ટરનેટના આગમન અને એમટીવી, વીટીવી, સહિતની વિદેશી ચેનલો આવ્યા પછી, આપણે જાણે કાળા અંગ્રેજ જેવા થઈ ગયા હોય તેમ લાગે છે. (એવું નથી કે ઇન્ટરનેટ, સ્માર્ટ ફોન કે ચેનલો બધાનો ખરાબ જ ઉપયોગ છે… ધારીએ તો તેનો સદુપયોગ પણ થઈ શકે ને કરનારા કરે જ છે, પણ મહદ્ંશે એમ થતું નથી.)

માનો કે અમેરિકા કે પશ્ચિમી દેશમાંથી કોઈ અહીં આવે તો તેને ભારતમાં શું જુદું લાગવાનું? કંઈ નહીં. ત્યાં જે શોપિંગ મોલ છે તે અહીં પણ છે. ત્યાં મલ્ટિપ્લેક્સ છે અહીંય છે. ત્યાં પુરુષો ટીશર્ટ ને બરમૂડામાં આંટા મારતા હોય તો અહીંય એ જ છે. ત્યાં સ્ત્રીઓ ટોપ અને સ્કર્ટ પહેરતી હોય તો અહીંય તે જ છે. ત્યાં વિભક્ત કુટુંબ છે અને અહીંય તેવું જ છે. ત્યા ક્રેડિટ કાર્ડ જેવા પ્લાસ્ટિક મની છે તે અહીંય છે. ત્યાંની ફિલ્મોમાં પ્રણયપ્રચુર (ઇન્ટિમેટ, યુ નો) દૃશ્યો આવતા હોય તો અહીંની ફિલ્મોમાં પણ એ બધું હવે છે. ટીવીની સિરિયલો અને શો પણ એ દેશોની સિરિયલો અને શોની નકલ જ છે અને એટલે જ ‘બિગ બોસ’માં અરમાન કોહલી અને તનીષા મુખર્જી કઢંગી હાલતમાં જોવા મળ્યા કે અગાઉ વીણા મલિક અને અસ્મિત પટેલની વાત  હોય…વિવાદો પણ એ જ છે.

જાતીય સતામણીની તો વાત જ શું કરવી? ઠેર ઠેર બળાત્કાર અને જાતીય સતામણીના કિસ્સા ‘I love my India’માં જોવા મળી રહ્યા છે. આસારામ, તરુણ તેજપાલથી માંડીને બસ ડ્રાઇવર સુધી બધાની જાતીયતા વિકૃત રૂપે ઠલવાઈ રહી છે. અને એમાં ક્યાંક ને ક્યાંક માધ્યમોનો કસૂર છે, છે ને સાડી સત્તરવાર છે. (વેસ્ટર્ન કલ્ચરથી ઇમ્પ્રેસ્ડ મેંગો અને એપલ ( મેંગો પીપલ = આમ આદમી એ તો જાણીતી  વાત છે, પણ એપલ પીપલ? જેની પાસે એપલના આઈફોન, આઈપેડ, ઇત્યાદિ હોય અને જે અંગ્રેજીના ‘આઈ’ ધરાવતા હોય એટલે કે અહંકાર, હું કહું તે જ સાચું, તેવા લોકો) પીપલ કહેશે કે દુર્યોધનના સમયમાં ક્યાં માધ્યમો હતાં? એ સમયમાં દુર્યોધન જેવા પણ કેટલા હતા એય જોવું જોઈએ. અત્યાર જેવું વ્યાપક ચલણ નહોતું કે જ્યાં જુઓ ત્યાં કેરેક્ટરના ઢીલા જ દેખાય.)

‘સિંઘમ’ ફિલ્મના ‘ગોટિયા’ની જેમ અત્યારે કોઈને સાચી પૂજામાં રસ નથી. (કદાચ પૂજા કરવતા ગોર/પંડિતો/બ્રાહ્મણોને પણ નહીં) તેમને મન તો પૂજા એટલે એક પ્રોગ્રામ, જે જલદી ‘ફિનિશ’ થવો જોઈએ, યૂ નો. તેમને વિધિ કહેતાં, ક્રિયાકર્મ, કે પછી રિચ્યૂઅલ્સ કેમ અને શા માટે તે સમજવાની તસ્દી નથી લેવી. પૂજા દરમિયાન પણ મોબાઇલ ફોન સાઇલન્ટ, વાઇબ્રન્ટ કે સ્વિચ ઑફ મોડમાં રાખવા નથી. સ્ત્રીઓની પણ એ જ હાલત છે. ચાંદલો, બિંદી વગેરેથી તેમને છૂટ્ટી જોઈએ છે. કેટલાં માબાપ તેમનાં છોકરા-છોકરીને બીજાં કોઈ પુસ્તકો નહીં તોય ગીતાજ્ઞાન વંચાવતા હશે? ભગવદ્ ગીતા તો મેનેજમેન્ટમાંય ભણાવાય છે અને તે કંઈ માત્ર જેને આપણે ધર્મ માની બેઠા છીએ, તેવું ધર્મનું પુસ્તક નથી. એ તો જીવન સારી રીતે જીવવાની પ્રેરણા અને માર્ગદર્શન આપતું પુસ્તક છે, જેને ગાંધીજી જેવા મવાળવાદીથી માંડીને લોકમાન્ય ટીળક જેવા જહાલ મતવાદી સરખું મહત્ત્વ આપે છે. માનો કે કોઈને સાચું જ્ઞાન લેવું છે તો સમજાવનારા પણ ક્યાં છે?

અને સંસ્કાર કે તહેઝીબ કોઈ એક ધર્મના જ મોહતાજ નથી. એ તો જેટલી સંસ્કૃતને મા ગણનારા લોકોમાં છે એટલું જ ઉર્દૂ બોલનારા જનાબમાં પણ છે અને ઇંગ્લિશ કલ્ચર્ડ લોકોમાંય એટલું છે. ઉર્દૂ અને હિન્દીમાં એક સરસ વાત છે- આપ. વ્યક્તિને મોટી ગણાવવા, તુમ (તમે) નહીં આપ કહેવું. અને એમાં માબાપ પોતાના દીકરાને પણ આપ કહે. આપને ખાના ખાયા? એ તુમને ખાના ખાયા કરતાં કેટલું મીઠું ને વિવેકી લાગે! ‘પહેલે આપ’ અને ‘આપ કે દુશ્મન કી તબિયત નાસાઝ હૈ’ની  વાત લખનઉની તહેઝિબમાં હતી એ જાણે આ ત્રાસવાદથી બદનામ ઇસ્લામ ધર્મમાં ક્યાંk ખોવાઈ લાગે છે.

જેમ નામ, કપડાં, વિધિ-વ્યવહાર બધું નાનું થતું ગયું તેમ કેટલીક પરંપરા પણ નાની થતી ગઈ. હવે પગે અડીને પ્રણામ કરાતા નથી. હવે પગે લાગવુ એટલે ઘૂંટણિયે લાગવું. ઘૂંટણને અડીને પ્રણામ કરી લીધા. બસ.

અને બીજી તરફ, સવાલ એ પણ છે કે માબાપે તેમના સંતાનને સારી પ્રવૃત્તિ કરાવવી હોય – શીખવાડવી હોય તો સમય ક્યાં છે? અને જો માબાપ પાસે સમય ન હોય તો બીજી કોઈ સંસ્થામાં મોકલવા હોય તો ક્યાં મોકલે? સ્વાધ્યાય પરિવાર? પંકજ ત્રિવેદીની હત્યા બાદ તેનું નામ ખરાબ થઈ ગયું છે. આસારામનાં કરતૂતોના કારણે તો હવે કોઈ પરિવાર એના દીકરા કે દીકરીને ત્યાં મોકલશે નહીં, અલબત્ત, સ્થિતિ એવી છે કે કોઈ ‘ધર્મ’ કે ‘ગુરુ’ની પાસે નહીં મોકલે. સ્વામિનારાયણ સંપ્રંદાયનો ડંકો તો વિદેશમાંય એવો વાગે છે કે બ્રિટનના વડા પ્રધાન ડેવિડ કેમેરોન હોય કે ત્યાંના રાજવી પરિવારના પ્રિન્સ ચાર્લ્સ, અક્ષરધામ અચૂક જાય છે. પરંતુ આ સંસ્થાના કેટલાક સજાતીયતાના દુરાચારના કિસ્સા બહાર આવ્યા છે, અરે! સ્વયં પ્રમુખસ્વામી સામે પણ ફરિયાદ થઈ ગઈ. અલબત્ત, એમાં તથ્ય ન હોવાનું બહાર આવ્યું, પરંતુ માધ્યમ ચીજ જ એવી છે કે એમાં બદનામીભર્યા સમાચાર જેટલા મોટા અક્ષરોમાં આવે છે એટલા એના રદિયાના નથી આવતા. એ તેનું ઉધારપાસું છે. અને એ બાબતે કોઈ ફરજ પાડતો ન્યાયાલય (કોર્ટ, યૂ નો)નો આદેશ કે કોઈ નૈતિક નિયમ પણ નથી.

એટલે અંતે તો પ્રશ્ન ત્યાં ને ત્યાં જ ઊભો રહે છે: જાયે તો જાયે કહાં!

જવાબ આપણે જ આપણી આજુબાજુ શોધવો રહ્યો અથવા આપણે જ જવાબ બનવું રહ્યું. માબાપ પાસે સમય ન હોય તો માએ તેના સાસુ-સસરાને આ ફરજ સોંપવી. જેમ કે, અમેરિકામાં રહેતી આ નાની દીકરીને તેના દાદા કનુભાઈ સૂચક અને તેમના પરિવારે સરસ મજાનાં ગુજરાતી બાળગીતો અને સંસ્કૃત શ્લોક શીખવ્યા છે. તેનો વિડિયો જોવા નીચેની લિંક પર ક્લિક કરો:

https://www.facebook.com/photo.php?v=10201595784910046

દાદા-દાદી સાથે મેળ ન પડતો હોય તો આજુબાજુમાં નજર દોડાવજો, સારી સંસ્થાઓ હજુ પણ છે જ.

ટૂંકમાં, એવું ભારત હજુ રાખીએ જેને ખરા અર્થમાં ભારત કહી શકાય, બહારથી લોકો આવે તો તેને કહી શકીએ,

‘કુછ દિન તો ગુજારિયે, ભારત મેં!’

society

આસારામ: કેટલાંક ધારદાર તથ્યો

આસારામ કેટલા લંપટ, કાનૂન તોડનારા અને વિકૃત છે તે બતાવવાની હોડ લાગી હોય (એ બધું સાવ ખોટું પણ નથી) ત્યારે અત્યારે આ લખવું કદાચ પ્રવાહની સામે લાગે પણ આ તથ્યો પર નજર કરો:
(1) રાજસ્થાનના કોંગ્રેસી મંત્રી ફાબુલાલ નાગર સામે બળાત્કારનો આરોપ, પણ ધરપકડ નહીં.
(2) રાજ્યસભાના ઉપાધ્યક્ષ પી.જે. કુરિયન પર છે…ક 1996થી બળાત્કારનો આરોપ, પણ ધરપકડ તો એકકોર રહી, ઉપાધ્યક્ષનું પદ પણ ચાલુ.
(3) ‘યુવરાજ’ પર પણ આવો જ આરોપ હતો પણ મામલાનું ફીંડલું વાળી દેવાયું.
(4) વિડિયો ફૂટેજમાંથી કેટલાક ફૂટેજ લઈને અથવા નેટ પર રહેલી તસવીરોમાંથી માણસને જેવો બતાવવો હોય- ભ્રષ્ટાચારી, લંપટ, હત્યારો- તેવો બતાવી શકાય. અત્યારે આવું ચાલે જ છે. (શીલા દીક્ષિત કે સુષમા સ્વરાજના ડાન્સને તોડીમરોડીને અપપ્રચાર ચાલે જ છે.) એક વાત મિડિયામાં દબાવી દેવાઈ કારણકે તેમાં તેમની નામોશી હતી. બ્રોડકાસ્ટિંગની નિયંત્રક સર્વોચ્ચ સંસ્થાએ જેતે ચેનલને નિત્યાનંદ અને દક્ષિણની અભિનેત્રી રણજીતાના કઢંગા અને મોર્ફ્ડ વિડિયો બતાવવા બદલ માફી માગવા આદેશ આપ્યો. એ વખતે તે ખોટું હશે તેમ કોઈ રીતે માનવામાં આવે? નિત્યાનંદની અગ્નિપરીક્ષાની પણ મજાક કરાયેલી.
આ જ ચેનલો થોડા સમય પહેલાં નિર્મલબાબા પાછળ પડી ગયેલી અને તેમનું પણ આવું જ કરૂપું ચિત્રણ કરાયેલું. હવે કેમ એ બંધ થઈ ગયું? શું નિર્મલબાબાએ તેમના ઠગધંધા બંધ કરી દીધા? ના. ઉલટા જોરશોરથી ચાલે છે. અને આ જ ચેનલો પર તેની જાહેરખબરો પણ આવે છે. યાદ રહે, આસારામનાં પ્રવચનો પણ આ જ ચેનલો સવાર સવારમાં બતાવતી હતી (અને ‘સેટિંગ’ થઈ જશે તો ફરી બતાવશે) આસારામનું કદ વધારવામાં પ્રસાર માધ્યમો અને રાજકારણીઓનો એટલો જ હાથ છે. આપણી પ્રજાનો મોટો વર્ગ પણ દોષિત છે જ. શા માટે છોકરી/સ્ત્રીને એકાંતમાં મોકલવી જોઈએ? માધ્યમો નક્કી કરે કે  તેટલા રૂપિયા મળે, અમે ગમે તેવા નાના કે મોટા સંતોનાં પ્રવચન નહીં બતાવીએ કે છાપીએ. બાકી, પ્રજા અને માધ્યમો નહીં જાગે તો આસારામ અલગ અલગ સ્વરૂપે મળતા જ રહેવાના.