abhiyaan, international, politics, technology

ફેસબુકની ખોરી દાનત: કર લો દુનિયા મુઠ્ઠી મેં!

છેલ્લા લગભગ એક સપ્તાહથી ફેસબુક, કેમ્બ્રિજ એનાલિટિકા અને ડેટા લીક આ ત્રણ શબ્દસમૂહો આપણા કાને સતત અથડાયા કરે છે, પરંતુ પૂરતી માહિતીનો અભાવ હવે દરેક માધ્યમમાં જોવા મળે છે. તેથી લોકોને ખબર નથી પડતી કે હકીકતે કોણે શું કર્યું?

હકીકતે કેમ્બ્રિજ એનાલિટિકા લંડન સ્થિત એક મોટી- માહિતી વિશ્લેષણ કરતી- પેઢી છે. આ કંપની એક સરકારી અને સૈન્ય કૉન્ટ્રાક્ટર સ્ટ્રેટેજિક કમ્યૂનિકેશન લેબૉરેટરિઝ (એસ.સી.એલ.) ગ્રૂપનો હિસ્સો છે, જે ખાદ્ય સુરક્ષા સંશોધનથી માંડીને રાજકીય બાબતો પર કામ કરે છે.

સાદી ભાષામાં કહીએ તો, માહિતી (ડેટા) મેળવવી અને તેનું વિશ્લેષણ કરી આપવું એ કેમ્બ્રિજ એનાલિટિકાનું કામ છે. વર્ષ ૨૦૧૬માં અમેરિકાના પ્રમુખની ચૂંટણીમાં ડૉનાલ્ડ ટ્રમ્પ માટે કામ કરીને તે ચર્ચામાં આવી હતી. ટ્રમ્પના અભૂતપૂર્વ વિજય માટે કેમ્બ્રિજ એનાલિટિકાને પણ યશ મળે  છે.  અમેરિકાની આ ચૂંટણીને ધ્યાનમાં રાખીને વર્ષ ૨૦૧૩માં કેમ્બ્રિજ એનાલિટિકાની સ્થાપના કરવામાં આવી હતી.

તે રાજકીય અને કૉર્પોરેટ ગ્રાહકોને ગ્રાહકો અંગેનાં સંશોધનોથી માંડીને લક્ષ્ય આધારિત ઍડવર્ટાઇઝિંગ (માનો કે જાહેરખબર બાળકો માટે જ છે તો તે બાળકો સુધી જ પહોંચે તે રીતની જાહેરખબર) અને માહિતી સંબંધિત અન્ય સેવાઓ આપે છે. તેની અનેક જગ્યાએ ઑફિસ છે જેમાં ન્યૂ યૉર્ક, વૉશિંગ્ટન, લંડન, બ્રાઝિલ, અને મલેશિયા સમાવિષ્ટ છે.

કેમ્બ્રિજે ફેસબુક, ગૂગલ, સ્નેપ ચેટ, ટ્વિટર અને યૂટ્યૂબનો ઉપયોગ કરીને ડૉનાલ્ડ ટ્રમ્પને જીતવામાં મદદ કરી હતી. પહેલાં તો ફેસબુક વગેરેની મદદથી અમેરિકાના મતદારોની માહિતી ભેગી કરવામાં આવી. પછી તેનું વિશ્લેષણ કરાયું કે કોને શું પસંદ છે, શું નથી પસંદ, કોનો રાજકીય ઝોક કઈ તરફનો છે. તે પછી પસંદ-નાપસંદ મુજબ વર્ગીકરણ કરી તેમને ગમે તે રીતે તેમની સમક્ષ ટ્રમ્પની તરફેણમાં અભિયાન ચલાવાયું. અભિયાન શું, તેને જાહેરખબર જ કહી શકાય.

તમને થશે કે આમાં કેમ્બ્રિજ એનાલિટિકાએ ખોટું શું કર્યું? માહિતી ભેગી કરવી અને તેનું વિશ્લેષણ કરવું તેમાં ખોટું કંઈ નથી, પરંતુ કેમ્બ્રિજ એનાલિટિકાએ જે માહિતી ભેગી કરી તે ફેસબુક પરથી ભેગી કરી અને તે પણ કાયદેસર નહીં. રીતસર સાઇબર ચોરી કરીને. તેણે ફેસબુકના પાંચ કરોડ વપરાશકારોની માહિતી એકઠી કરી.

ફેસબુક પર લોકો પોતાની અંગત માહિતી મૂકતા હોય છે તે સાચું, પરંતુ તે બધાને જોઈ શકાય તેમ હોતી નથી. તેમાં સિક્યૉરિટીનાં સેટિંગ હોય છે, પરંતુ કેમ્બ્રિજ એનાલિટિકાએ ફેસબુકમાં ઘૂસણખોરી કરાવીને આ માહિતી મેળવી લીધી તેથી તેના પર આ આક્ષેપ થઈ રહ્યા છે અને જે ખરેખર ગંભીર છે. પરંતુ આમાં ફેસબુકનો વાંક પણ નાનોસૂનો નથી.

ચૂંટણીને પ્રભાવિત કરવાનો આરોપ તો ફેસબુક પર ૨૦૧૬થી લાગી રહ્યો છે અને તે માટે તે અમેરિકામાં તપાસનો સામનો પણ કરી રહી છે. અમેરિકાની ચૂંટણીને ડૉનાલ્ડ ટ્રમ્પની તરફેણમાં પ્રભાવિત કરવા રશિયાએ કેટલીક જાહેરખબરો ફેસબુક પર આપી હતી. (તેમાં કેમ્બ્રિજ એનાલિટિકાની ભૂમિકા કઈ જાહેરખબર કયા વપરાશકાર સુધી પહોંચવી જોઈએ તેમાં મદદગાર તરીકેની હોઈ શકે.) આ જાહેરખબર મતદારોમાં શ્વેત વિરુદ્ધ અશ્વેતનો વર્ગવિગ્રહ વધારનારી હતી. એટલે કે શ્વેત સમુદાયમાં અશ્વેત વિરુદ્ધ ભાવના ભડકે અને તેઓ ટ્રમ્પ માટે મતદાન કરવા પ્રેરાય. ઉપરાંત સરહદ સુરક્ષિત રહે તે માટેની જાહેરખબર પણ આપી હતી. આમ, લોકોમાં દેશની સુરક્ષા ખતરામાં છે તેવી ભાવના ઉશ્કેરવામાં આવી હતી. ટ્રમ્પ આવશે તો દેશ સુરક્ષિત બનશે તેવું લોકોના મનમાં ઠસાવાયું હતું. આ ઉપરાંત મુસ્લિમ લોકોને દેશમાં આવતા રોકવા માટે પણ અભિયાન ચલાવાયું હતું જેથી દેશમાં ત્રાસવાદ ન ફેલાય. તદુપરાંત, અમેરિકાને ફરી મહાન બનાવવા માટે પણ અભિયાન ચલાવાયું હતું. આ બધાના કારણે લોકો ટ્રમ્પને મત આપવા વધુ દૃઢ બને તે સુનિશ્ચિત કરાયું હતું.

ફેસબુક પર રશિયા દ્વારા જાહેરખબરો અંગે તો ૨૦૧૬માં કૌભાંડ બહાર આવી ગયું હતું. પહેલાં તો કોઈ પણ ગુનેગાર કરે તેમ, ફેસબુકના માર્ક ઝુકરબર્ગે પણ તેને (૧૦ નવેમ્બર ૨૦૧૬ના રોજ) નકારી કાઢ્યું અને કહ્યું કે ફેસબુક પર ચૂંટણીને પ્રભાવિત કરે તેવા ખોટા સમાચાર (ફૅક ન્યૂઝ) મૂકાયા હોવાની વાત ગાંડપણ છે. આનું કારણ કદાચ એ હતું કે ઝુકરબર્ગને કિંગ મેકર બનવામાં મજા આવી હતી અને તે કરતાંય તેને પૈસા કમાવવા મળતા હોય તો તે શા માટે જતા કરે? તેણે કંઈ સેવા કરવા તો ફેસબુક ખોલી નહોતી. આ વાત સાચી અને જાહેરખબરો મૂકાય તેમાં કોઈને વાંધો ન હોવો જોઈએ, પરંતુ અમેરિકાની ચૂંટણી પ્રભાવિત થાય, લોકોમાં કારણ વગર વેરઝેર વધે, રોષ વધે અને ખોટી રીતે લોકો ટ્રમ્પ તરફ ઝૂકે તે રીતની જાહેરખબર લેવી તે અનૈતિક કહેવાય.

૧૮ નવેમ્બર ૨૦૧૬ના રોજ ઝુકરબર્ગે થોડી પલટી મારી અને કહ્યું કે ફૅક ન્યૂઝ મૂકાયા તો હતા, પરંતુ તેનું પ્રમાણ બહુ નાનું હતું. ૧૭ એપ્રિલ ૨૦૧૭ના રોજ ફેસબુકે જાહેર કર્યું કે તેણે ૩૦,૦૦૦ બનાવટી ખાતાં દૂર કર્યાં છે જે ફ્રાન્સની ચૂંટણીને પ્રભાવિત કરી શકે તેમ હતાં. પરંતુ ૬ સપ્ટેમ્બર ૨૦૧૭એ ફેસબુકે કબૂલી લીધું કે તેણે પૈસા લઈને રશિયાની અમેરિકાના મતદારોને પ્રભાવિત કરતી જાહેરખબરો ચલાવી હતી. તેણે ત્યારે તો એમ જ કીધું કે માત્ર ૪૭૦ નકલી ખાતાં જ ૩,૩૦૦ જાહેરખબર સાથે સંકળાયેલાં હતાં. ૬ ઑક્ટોબરે ફેસબુકે કહ્યું કે અંદાજે ૧ કરોડ લોકોએ રશિયાની આ જાહેરખબરો જોઈ હતી. ૩૧ ઑક્ટોબરે વળી પલટી મારી આ આંકડો ૧૨.૬ કરોડનો હોવાનું કહ્યું! જેમજેમ તપાસ આગળ વધતી ગઈ તેમતેમ ફેસબુકનાં નિવેદનોમાં પલટા આવતા ગયા અને ૧ નવેમ્બર, ૨૦૦૧૭ના રોજ એણે સ્વીકારી લીધું કે હકીકતે તો રશિયાની જાહેરખબરો ૧૫ કરોડ અમેરિકનો સુધી પહોંચી હતી!  આના પરિણામે અમેરિકામાં ફેસબુક સામે સંસદીય એટલે કે કૉંગ્રેસ (ત્યાં લોકસભા જેવા નીચલા ગૃહને કૉંગ્રેસ કહે છે)ની તપાસ શરૂ થઈ.

આ બધું ચાલતું હતું ત્યાં નવો ફણગો ફૂટ્યો. બ્રિટનની ચૅનલ ૪ ન્યૂઝે ૧૯ માર્ચે સ્ટિંગ ઑપરેશન દેખાડ્યું. ભાષા અંગ્રેજી જ હોવા છતાં શબ્દોનો ફરક હોવાના કારણે બ્રિટનના મિડિયામાં તેને સ્ટિંગ ઑપરેશન નહીં, પરંતુ અંડરકવર ઑપરેશન કહે છે. આ કામગીરીમાં કેમ્બ્રિજના સીઇઓ એલેક્ઝાન્ડર નિક્સ સહિતના વરિષ્ઠ અધિકારીઓ એમ કહેતા પકડાયા કે વિશ્વ ભરમાં તેમના ગ્રાહકોને જિતાડવા માટે કેમ્બ્રિજ વેશ્યાઓનો ઉપયોગ કરી શકે છે, લાંચ આપી શકે છે અને ખોટી માહિતી પણ પ્રસરાવી શકે છે. ટૂંકમાં, પોતાના ગ્રાહકો (એટલે કે રાજકીય નેતા કે પક્ષ તરફથી) મસમોટી રકમ પડાવીને તેમને જિતાડવા તે કંઈ પણ, એટલે કંઈ પણ કરી શકે છે.

ન્યૂઝ ચૅનલના રિપૉર્ટર શ્રીલંકાના એક ધનવાન પરિવાર તરીકે ગયા હતા, જેમને રાજકીય ફાયદો મેળવવો હતો. પહેલાં તો કેમ્બ્રિજના અધિકારીઓ બહુ ખુલ્યા નહીં, પરંતુ જેમ મુલાકાતો આગળ વધતી ગઈ અને તેમને લાગ્યું કે પાર્ટી ખરેખર સાચી જ છે, તેમ તેમણે પોતે પોતાના ગ્રાહકોને જિતાડવા શું-શું કરી શકે છે તે વાત કરી. બ્રિટનની ચૅનલ ૪ ન્યૂઝે દિવાસળી ચાંપી દીધી એટલે ભડકો થવાનો જ હતો…

આગમાં ઘી હોમવાનું કામ કર્યું અમેરિકાના ન્યૂ યૉર્ક ટાઇમ્સ અને યુ.કે.ના ઑબ્ઝર્વર સમાચારપત્રોએ. તેમણે કેમ્બ્રિજ એનાલિટિકાના સહસ્થાપક ક્રિસ્ટૉફર વાઇલીને ટાંકીને ઘટસ્ફોટ કર્યો કે ફેસબુકના પાંચ કરોડ વપરાશકારોનો ડેટા કેમ્બ્રિજ એનાલિટિકાએ ચોરી લીધો છે! આપણને સૉશિયલ મિડિયા સારું લાગે તે સ્વાભાવિક છે, પરંતુ જેમજેમ તેનું મહત્ત્વ સ્થાપિત થતું જાય છે તેમ તેમ તેના માલિકોનાં સ્થાપિત હિતો પણ દેખાવાં લાગ્યાં છે. વ્હિસલબ્લૉઅર (એટલે કે કૌભાંડ ઉઘાડું પાડનાર) ક્રિસ્ટૉફર વાઇલીએ તો ફેસબુક અને કેમ્બ્રિજ એનાલિટિકાનું કૌભાંડ ઉઘાડું પાડ્યું, એટલે ફેસબુકે તેનું ખાતું બ્લૉક કરી દીધું.

કેમ્બ્રિજ યુનિવર્સિટીના પ્રાધ્યાપક એલેક્ઝાન્ડર કૉગાન અને તેની કંપની ગ્લૉબલ સાયન્સ રિસર્ચે વર્ષ ૨૦૧૪માં ‘thisisyourdigitallife’ નામની ઍપ બનાવી. વપરાશકારોએ (સ્વેચ્છાએ) એક મનોવૈજ્ઞાનિક ટેસ્ટ આપવાનો હતો. અને આ રીતે આ ઍપ વપરાશકારોનો ડેટા ભેગી કરી લેતી હતી. (જુઓ બૉક્સ-ફેસબુક પરની ઍપથી સાવધાન) તેમાં જેતે વપરાશકારના ફેસબુક મિત્રોનો ડેટા પણ હતો. ગાડરિયા પ્રવાહમાં જોડાઈ ૩ લાખ લોકોએ આ ઍપના ટેસ્ટમાં ભાગ લીધો. કૉગાને આ ડેટા કેમ્બ્રિજ એનાલિટિકાને (નાણાંના બદલામાં જ) આપી દીધો. તેનાથી કેમ્બ્રિજ એનાલિટિકાને એક સૉફ્ટવેર બનાવવામાં મદદ મળી જે ચૂંટણીમાં મતદારોને પ્રભાવિત કરી શકે તેમ હતું.

આ બાબતે પણ ફેસબુકે, અમેરિકાની ચૂંટણીમાં રશિયાની જાહેરખબરની જેમ જ, પહેલાં તો ટાળમટોળ કર્યું. બ્રિટનની ચૅનલ ૪, ન્યૂ યૉર્ક ટાઇમ્સ અને ઑબ્ઝર્વરના અહેવાલોથી દુનિયાભરમાં ખળભળાટ મચી ગયો પરંતુ શરૂઆતમાં ફેસબુકનું નિવેદન કેવું આવ્યું? તેણે કહ્યું કે “અમારા ડેટા એનાલિસ્ટોની સ્વેટ (SWAT-જે મેનેજમેન્ટમાં ભણવામાં આવે છે) ટીમ કેમ્બ્રિજ એનાલિટિકામાં દિવસરાત કામ કરી રહી છે.” મંગળવારે એટલે કે ૨૦ માર્ચે ઝુકરબર્ગમાં એક મીટિંગમાં તેના પોતાના કર્મચારીઓનો જ સામનો કરવાની હિંમત ન થઈ, પણ તે દિવસે તેની પીઆર (પબ્લિક રિલેશન) ટીમે નિવેદન બહાર પાડીને કહ્યું કે “આમાં અમારી કોઈ સંડોવણી નથી, ઉલટાના અમે છેતરાયાની લાગણી અનુભવીએ છીએ!” પરંતુ લોકો સત્ય જાણતા હતા અને તેની અસર અમેરિકાના શેરબજાર પર પડવા લાગી હતી. ઝુકરબર્ગને એક અઠવાડિયામાં તો ૬૦ અબજ ડૉલર (અંદાજે ૩૯૦૦ અબજ રૂપિયા) ગુમાવવા પડ્યા.

ડૉલર ડૂબતા જણાયા એટલે ડૉલરનો જ સહારો લઈ ઝુકરબર્ગે ફૂલ પેજ ઍડ છાપાઓમાં આપી. તેના મોટામોટા સમાચાર પણ બન્યા કે ઝુકરબર્ગે માફી માગી. આમ (આપણા સહિત) વિશ્વ ભરના મિડિયાએ એવી હવા બનાવી જાણે માફી માગીને ઝુકરબર્ગે મહાન કામ કર્યું હોય, પરંતુ શું આ ખરેખર માફી ગણાય? કારણકે ઝુકરબર્ગે ‘સૉરી’ તો કહ્યું, પરંતુ તેમાં તેનો ટૉન એવો હતો કે ફેસબુકની કોઈ ભૂલ નથી, આ તો પેલા ઍપ ડેવલપર (કૉગાને) વિશ્વાસનો ભંગ કર્યો છે, અને હવે અમે સુરક્ષા વધુ કડક બનાવીશું જેથી ભવિષ્યમાં આવું કંઈ ન થાય.

સૉશિયલ મિડિયા પર આવી જવાથી તેની એબીસીડી આવડી નથી જતી, (આ બૉક્સમાં જણાવ્યા તેમ ઍપ જેવાં) તેનાં અનેક અટપટાં પાસાં છે. લોકોને લાઇક મળે, વાહવાહ થાય એટલે મજા આવી જાય, પરંતુ સૉશિયલ મિડિયા તમારી સેવા કરવા માટે નથી જ. ફેસબુક તો નહીં જ. આ કૌભાંડ પછી ફેસબુકે હવે અમેરિકા ઉપરાંત યુકે, સિંગાપોર, ભારત સહિતના દેશોમાં આકરી તપાસનો સામનો કરવાનો વારો આવ્યો છે. સિંગાપોરમાં તો ભારતીય મૂળના કે. શમુગમ ફેસબુકના મીંઢા અને જાડી ચામડીના, સવાલોના જવાબ ટાળતા પ્રતિનિધિને કડક રીતે રોકડું પારખી દે છે તેવો વિડિયો વાઇરલ થયો છે. (ફેસબુક હવે એન્ટિ સૉશિયલ બનતું જાય છે તે જોતાં તેની સામે સિંગાપોરની સરકારે પ્રચાર સૉશિયલ મિડિયા દ્વારા આ વિડિયો મૂકીને જ કરી દીધો. શઠમ્ પ્રતિ શાઠ્યમ્!) હકીકતે ફેસબુકે વર્ષ ૨૦૧૧માં ફૅડરલ ટ્રેડ કમિશન સાથે એક સંધિ કરી હતી જેમાં એવી શરત હતી કે તે તેના વપરાશકારોના પ્રૉફાઇલ ડેટાનો અનધિકૃત ઉપયોગ નહીં કરવા દે. હવે આ શરતનો ભંગ થયેલો જણાય છે. જો અલગ-અલગ દેશના સત્તાધીશો ખાનગીમાં મસમોટી રકમ લઈને ઝુકરબર્ગ સામે ઝૂકી નહીં જાય તો ઝુકરબર્ગને જેલ જવાનો વારો પણ આવી શકે છે અને તો કદાચ, ફેસબુકનાં પાટિયાં પડી જશે. ભવિષ્યમાં જે થાય તે, પણ અત્યારે તો લોકોએ #DeleteFacebook અને #BoycottFacebookનો ટ્રેન્ડ ચલાવી ફેસબુકનાં પોતાનાં ખાતાં રદ્દ કરવાનું ચાલુ કરી દીધું છે.

Advertisements
sankalan shreni, television

સાંસ્કૃતિક આઘાત કરતી ટીવી જાહેરખબરો

(સંકલન શ્રેણી પાક્ષિક તા. ૭/૮/૧૫ની કવરસ્ટોરી)

આપણે મોટા ભાગે માનતા હોઈએ છીએ કે ભારત દેશના દુશ્મનો ચીન અને પાકિસ્તાન છે. ક્યારેક ત્રાસવાદને આપણું મોટો શત્રુ માનીએ છીએ તો ક્યારેક ગરીબીને પણ આપણી રિપુ લેખાવાય છે. પણ સાંસ્કૃતિક આક્રમણથી મોટો શત્રુ કોઈ નથી. કોઈ દેશને જીતવો હોય તો તેના દેશના લોકોને તેમની સંસ્કૃતિ પ્રત્યે ધિક્કાર કરતા કરી દો, તેમને તેમનાં મૂલ્યોથી વિમુખ કરી દો, તમે યુદ્ધ જીતી ગયા. પશ્ચિમી દેશો અને તેમણે સ્થાપેલી કોન્વેન્ટિયા શાળામાં ભણેલા લોકો આ જ કામ કરી રહ્યા છે. ફિલ્મો, સિરિયલો અને ટીવી પર આવતી જાહેરખબરો દ્વારા થતું સાંસ્કૃતિક આક્રમણ ન દેખાય તેવું છે, પરંતુ તે અત્યંત ખતરનાક છે. આપણે આ કવરસ્ટોરીનો વિષય માત્ર ટીવી પર આવતી જાહેરખબરો પૂરતો સીમિત રાખીએ.

ટીવી પર દર દસ મિનિટે એક બ્રેક આવે છે. કહેવાય છે તો બે મિનિટનો બ્રેક પણ ઘણી વાર તેનાથી વધુ હોય છે. તે બે મિનિટમાં તમે ઓછામાં ઓછી પાંચેક જાહેરખબર જુઓ છો અને તે જાહેરખબરો દરેક બ્રેકમાં રિપિટ થતી હોય છે. આજે માણસ સરેરાશ પાંચથી છ કલાક ટીવી જુએ છે. અને જાહેરખબરો માત્ર મનોરંજન આપતી ચેનલો જેવી કે સ્ટાર પ્લસ, સોની, ઝી ટીવી વગેરે પર જ નથી બતાવાતી, પણ ન્યૂઝ ચેનલો, ફૂડ ચેનલો, મૂવી ચેનલો કોઈ પણ ચેનલ લો, તેના પર આ જાહેરખબરો દર્શાવાય છે. તે બનાવનારા લોકોમાંથી મોટા ભાગના ભારતીયતામાં માનનારા નથી હોતા અને તે પશ્ચિમી જાહેરખબરો પરથી પ્રેરાઈને જાહેરખબર લખતા- ફિલ્માવતા હોય છે. વળી, તેમાં જે અભિનેતા કે અભિનેત્રી કામ કરે છે તેમના માટે ફિલ્મો કે સિરિયલ મેળવવાનું આ પહેલું પગથિયું હોય છે. તેથી તેઓ પણ આવી જાહેરખબરોમાં બિન્દાસ કામ કરે છે. આ જાહેરખબરો દિવસમાં ઓછામાં ઓછી ૩૬થી ૪૦ વાર આપણી આંખો અને કાનોમાં અથડાય છે. કહેવાય છે કે એક ને એક જૂઠાણું જો વારંવાર કહેવામાં આવે તો માણસ તેને સત્ય માનવા લાગે છે.

જ્યારે ભારતમાં ટીવી જગતનો પ્રારંભ થયો ત્યારે પણ જાહેરખબરોમાં જૂઠાણાં અને આપણને આપણા ધર્મ-સંસ્કૃતિ અને મૂલ્યોથી વિમુખ કરવાનો પ્રયાસ હતો જ પરંતુ હવે એ અનહદ વધી ગયો છે. આવી જાહેરખબરોના રચયિતાઓ પોતાના બચાવમાં એવો દાવો કરતા હોય છે કે તેઓ સમાજનું જ પ્રતિબિંબ પાડે છે, પરંતુ એવું હોતું નથી.

આપણે કેટલીક જાહેરખબરોનાં ઉદાહરણ સાથે ચર્ચા કરીએ તો વધુ સમજાશે. કેડબરી ફાઇવ સ્ટારની ‘રમેશ-સુરેશ’નાં પાત્રોવાળી અનેક જાહેરખબરો આવી ગઈ છે. તેમાં એકમાં રમેશ-સુરેશના પિતાજીને મળવા માટે કોઈ ભાઈ આવે છે. તેના પિતાજી બહાર બેઠા છે. બહાર ખુરશી મૂકવા પિતાજી રમેશ-સુરેશને કહે છે. રમેશ-સુરેશ ચોકલેટ ખાતાં ખાતાં એવા ખોવાઈ ગયા છે કે તેમને સંભળાય છે તો ખરું પણ તેઓ અમલ કરતા નથી. આથી છેવટે પિતાજી અને મહેમાન અંદર આવે છે અને બેસવા જતા હોય છે ત્યાં જ રમેશ-સુરેશ એ સોફા લઈને બહાર એમ કહેતા જાય છે કે ‘અંકલજી કી કુર્સી ઝટ સે આ ગઈ’. બોલો, આવા નકામા છોકરા થવાનો સંદેશો આપતી જાહેરખબર સારી કહેવાય કે?

કોલગેટની વર્ષો પહેલાં (એટલે કે દૂરદર્શનના સમયમાં) એક જાહેરખબર આવતી હતી જેમાં કોલસા અને મીઠું ઘસતા માણસની મજાક ઉડાવાતી હતી અથવા આવું ઘસવાની ના પાડતા હતા અને કોલગેટ ઘસવાનું કહેતા હતા. આજે કોલગેટની જાહેરખબરમાં તમે ઢાબામાં જમતા હો અને મૂળો ખાવા જતાં દાંતમાંથી લોહી નીકળે એટલે અચાનક અભિનેત્રી પ્રિયંકા ચોપરા સુપરમેનની જેમ આકાશમાંથી પ્રગટ થઈ જાય છે. અને તે પૂછે છે ક્યા આપકે ટૂથપેસ્ટ મેં નમક ઔર નીમ હૈ? ઉપરાંત લારા દત્તાવાળી કોલગેટની જાહેરખબરમાં કહે છે કે કોલસાથી દાંત ચોખ્ખા થાય છે. બહેન, અમારા વડવાઓ તો કોલસા અને મીઠાથી દાંત ઘસતા જ હતા. તમને હવે જ્ઞાન લાધ્યું?

આપણા સમાજમાં ટાપ-ટીપનું મહત્ત્વ હતું પરંતુ એ ઘરેલુ નુસખાથી જ કરાતી હતી. જ્યારથી ઉદારીકરણ અને વૈશ્વીકરણનો પ્રારંભ થયો ત્યારથી કોસ્મેટિક ઉત્પાદનોમાં ઊછાળો આવી ગયો છે. મિસ વર્લ્ડ અને મિસ યુનિવર્સ તરીકે ભારતીય સુંદરીઓને વિજેતા બનાવી દેવાઈ, તે પછી સુંદર દેખાવવાની યુવતીઓમાં હોડ વધી ગઈ. પોતાનું કામ પૂરું થઈ ગયું એટલે કંપનીઓએ ભારતીયોને મિસ વર્લ્ડ અને મિસ યુનિવર્સ તરીકે વિજેતા બનાવવાની બંધ કરી બીજા દેશોને પ્રલોભવાનું ચાલુ કર્યું. હવે સ્ત્રીઓ તો સૌંદર્ય પ્રસાધનો ઢગલાબંધ વાપરતી થઈ એટલે આ કંપનીઓ હવે પુરુષોને નિશાન બનાવી રહી છે. શાહરુખ ખાન અને જોન અબ્રાહમ જેવા જાણીતા કલાકારોને લઈને પુરુષોને ગોરા બનાવવાનું છેતરામણું વચન આપતી ફેરનેસ ક્રીમની જાહેરખબરો આવી રહી છે. હકીકતે ઈશ્વરે જેને જે રૂપ આપ્યું છે તે જ રહેવાનું અને આપણા ભગવાન શ્રી રામ અને શ્રીકૃષ્ણ શ્યામ છે. આપણે ત્યાં રૂપ કે રંગ કરતાં સદ્ગુણોને પ્રાધાન્ય અપાયું છે અને આઠે અંગ વાળા અષ્ટવક્રને પણ મહાન ગણાવાયા છે. પરંતુ આ જાહેરખબર ગેરભ્રમે દોરનારી છે.

ભારતમાં પાન મસાલા પર ઘણી જગ્યાએ પ્રતિબંધ છે અને મોટા ભાગે એવી માન્યતા છે કે સ્ત્રીઓ તો પાન મસાલા ન જ ખાય. તે તો ધાણા દાળ, વરિયાળી, તલ, અજમા વગેરે ખાય. પરંતુ હવે સ્ત્રીઓને પણ પાનમસાલા ખાતી કરવાની બદઈરાદાવાળી જાહેરખબર ટીવી પર વારંવાર દેખાડાઈ રહી છે. શાહરુખ ખાન અને રીમા લાગુએ ફિલ્મી પડદે ઘણી વાર દીકરા-માની ભૂમિકા કરી છે. તેમને લઈને આ જાહેરખબર બનાવાઈ છે. તેમાં બતાવાય છે કે પાન વિલાસ નામનો પાનમસાલો ખાવાથી રીમા લાગુનો ગુસ્સો શાંત થઈ જાય છે અને તેઓ સીટી મારવા લાગે છે!

અંતઃવસ્ત્રોની તો જાહેરખબરો પાર વગરની ગંદી હોય છે. અમૂલ નામના અંતઃવસ્ત્રની જાહેરખબરમાં એક યુવતી ભણવા અગાશી પર આવી હોય છે પરંતુ તે એક પુરુષને કસરત કરતો જોઈ જાય છે. તેની પત્ની કપડાં સૂકવતી હોય છે અને તેના કારણે યુવતીને દેખાતું નથી. અને તે જોખમ લઈને ટાંકી પર ચડી જાય છે. આવી જાહેરખબરો વારંવાર માનસ પર અથડાયા રાખે ત્યારે ગંદી છાપ જ છોડી જવાની કે નહીં?

અત્યારે જેના પર પ્રતિબંધ છે તેવી મેગીની એક જાહેરખબરમાં અભિનેત્રી ઝરીના વહાબને માતા બતાવાય છે અને તે તેની દીકરીને પૂછે છે કે તું એક જ શહેરમાં અમારાથી અલગ કેમ રહે છે? દીકરી કહે છે કે હું એકવીસ વર્ષની થઈ ગઈ છું અને હવે ઇન્ડિપેન્ડન્ટ રહેવા માગું છું. બોલો! આવું આપણા સમાજમાં ક્યાં જોવા મળ્યું? ૨૧ વર્ષની થઈ એટલે દીકરીએ અલગ રહેવાનું? દીકરાએ પણ અલગ શું કામ રહેવાનું હોય? વિભાજીત થયેલા કુટુંબને ઓર વિભાજીત કરવાની વાત થઈ આ.

રેડ લેબલ નામની ચાની એક નવી જાહેરખબરમાં કેવું બતાવાય છે? ચિરાગ નામનો દીકરો ક્યાંક બહારગામ ભણે છે. (મહાનગર જ હશે તેમ કલ્પી લઈએ.) તેના જન્મદિવસે તેને સુખદ આશ્ચર્ય આપવા તેનાં માતાપિતા તેના ઘરે આવી ચડે છે અને જુએ છે તો છોકરી પણ છે! ચિરાગ ખુલાસો કરે છે કે આ પલ્લવી છે. અમે સાથે જ રહીએ છીએ. છોકરી માતા-પિતા માટે ચા બનાવી લાવે છે. મા કહે છે કે ચિરાગના પિતાને ડાયાબિટીસ છે એટલે તેને ખાંડ વગરની ચા ચાલશે. પણ પલ્લવી બતાવે છે કે તેને ખબર છે એટલે તે આવી જ ચા લાવી છે. એટલે દીકરો ચાના સંદર્ભમાં પૂછે છે કે કૈસી હૈ? મા (અભિનેત્રી હિમાની શિવપુરી) કહે છે, “બૂરી નહીં હૈ”. આ વાક્ય ચા અને પલ્લવી બંનેના સંદર્ભમાં હતું. હવે કહો જોઈ, આ જાહેરખબર લિવ ઇન રિલેશનશિપનો પ્રચાર કરે છે કે નહીં?

ઝટક નામના ડીઓની જાહેરખબરની વાત કરીએ. તેમાં એક નવોઢાની લગ્નની પહેલી રાત્રિ છે. તે પલંગ પર પતિની રાહ જોતી બેઠી હોય છે ત્યાં એક સુગંધ આવે છે. આ સુગંધ તેને એટલી ઉત્તેજિત કરી દે છે કે તે તેના રૂમની બારી ખોલીને જુએ છે તો સામે બીજી બારીમાં કોઈ છોકરો આ ડીઓ છાંટતો દેખાય છે. આના કારણે નવોઢા તે છોકરા આગળ પોતાનું ચારિત્ર્ય ગુમાવવા તૈયાર થઈ જાય છે, તેની સાડી સરી પડે છે અને પોતાના હાથમાં પતિએ પહેરાવેલી વીંટી કાઢી નાખતી બતાવાય છે. અનૌક નામની એક વસ્ત્રોની બ્રાન્ડની જાહેરખબરમાં બે યુવતીઓને સમલૈંગિક બતાવીને હદ જ કરી નાખી.

પીયર્સ નામના એક સાબુની જાહેરખબરમાં મા (અભિનેત્રી હુમા કુરૈશી) તેની દીકરીને નવડાવતા નવડાવતાં પ્રખ્યાત ગીત ‘દિલ હૈ છોટા સા’ની ધૂનમાં ઇતિહાસ શીખવાડે છે કે બાબર કા બેટા હુમાયુ, હુમાયુ કા બેટા અકબર. આ જાહેરખબર જોઈને અનેક બાળકોને બાબરની વંશાવળી યાદ રહી ગઈ હશે. સવાલ એ છે કે ભારત પર આક્રમણ કરીને અનેક નિર્દોષોને મારનારાઓની વંશાવળી શું કામ યાદ કરાવવી જોઈએ?

ટીવીની જાહેરખબરોમાં મોટા ભાગે હિન્દુ પાત્રો જ હોય છે. તેથી શું સંદેશો જાય? હિન્દુ યુવતી ૨૧ વર્ષની થાય એટલે તેણે અલગ રહેવું જોઈએ. હિન્દુ દીકરો હોય તો તે લિવ ઇન રિલેશનશિપમાં રહે તો વાંધો નહીં. હિન્દુ નવોઢા એક સુગંધ માટે પોતાનું ચારિત્ર્ય ગુમાવી પારકા પુરુષ સાથે સંબંધ બાંધવા તૈયાર થઈ જાય. હિન્દુઓએ આક્રમણ કરનારાઓનો વંશ યાદ રાખવો જોઈએ, તેમને સારા માનવા જોઈએ.

શું આ જાહેરખબરોમાં અન્ય ધર્મનાં પાત્રો જ નથી બતાવાતાં? બતાવાય છે ને પણ કેવી રીતે? રેડ લેબલની જ એક જાહેરખબરમાં હિન્દુ દંપતી પોતાના ઘરની ચાવી ભૂલી ગયાં છે. પડોશી મુસ્લિમ મહિલા છે. તે તેમને પોતાના ઘરમાં રાહ જોવા કહે છે. હિન્દુ દંપતી પૈકી પતિ અચકાય છે. તેમ છતાં મુસ્લિમ મહિલા ચા મૂકી દે છે અને તેની સુગંધથી હિન્દુ પતિ માની જાય છે. તે પત્ની સાથે ઘરમાં જાય છે અને ચા પીએ છે. એટલું જ નહીં એક ઓર ચા માગે છે. આનો અર્થ એ થયો કે હિન્દુઓ રૂઢિચુસ્ત અને સંકુચિત માનસિકતાવાળા હોય છે,મુસ્લિમો સાથે હળતાભળતા નથી. જ્યારે મુસ્લિમો સહૃદય હોય છે. તેઓ મહેમાનગતિ સારી કરી જાણે છે.

વાંદાને મારવા માટે વપરાતા રેડ હિટની જાહેરખબરમાં એવું બતાવાય છે કે છોકરો માંદો પડી ગયો છે અને માતા કહે છે કે સ્કૂલનું પાણી પીવાના કારણે આવું થયું. ત્યાં અચાનક સંખ્યાબંધ ખ્રિસ્તી સાધ્વી (નન) જેવી ચાર-પાંચ મહિલા પ્રગટ થાય છે. તેમના ગળામાં ક્રોસ લટકે છે અને તેઓ કહે છે કે તમારા ઘરના વાંદાના કારણે તે માંદો પડ્યો છે. મતલબ કે ક્રિશ્ચિયન કે કોન્વેન્ટ સ્કૂલો તો હંમેશાં સારી જ હોવાની. આ રીતે નનને તો સારી બતાવાય છે પણ જાહેરખબરોમાં સાધુ-સંતો અને બાબાની મજાક ઉડાવાય છે.

પ્રશ્ન એ થાય છે કે ફિલ્મને પ્રસારિત કરવા માટે સેન્સર બૉર્ડ છે, પરંતુ સિરિયલો કે જાહેરખબરો માટે કેમ સેન્સર બૉર્ડ કંઈ કરતું નથી? ફિલ્મો તો ત્રણ કલાક પૂરતી જ અસર કરે જ્યારે આ જાહેરખબરો તો ૩૬૫ દિવસ X ૫ કલાક અસર કરે છે. તેની સામે તમે એડવર્ટાઇઝિંગ સ્ટાન્ડર્ડ કાઉન્સિલ ઑફ ઇન્ડિયાને ફરિયાદ કરી શકો, પરંતુ તે કેટલી અસરકારક છે તે એ ઉદાહરણ પરથી જ સાબિત થાય છે કે આવી જાહેરખબરો આવતી જ રહે છે.

gujarat guardian, television

ચેનલોનું ઘોડાપૂર આવવા પાછળ તર્ક અને કારણ

હમણાં એક સમાચાર આવ્યા કે અક્ષયકુમાર અને રાજ કુન્દ્રા સાથે મળીને એક શોપિંગ ચેનલ શરૂ કરવાના છે. આ સમાચારે બે રીતે લોકોનું ધ્યાન ખેંચ્યું. એક તો એ કે, અક્ષયકુમાર એટલે શિલ્પા શેટ્ટીનો પૂર્વ પ્રેમી તો રાજ કુન્દ્રા તેનો પતિ. (પતિની આગળ વર્તમાન કોણે વાંચ્યું?) અગાઉનો સમય હોત તો આવું વિચારી શકાત? રાજ કપૂર અને સુનીલ દત્ત ભેગા મળીને એક ફિલ્મ બનાવી હોત તેવો ક્યારેય વિચાર સપનામાં પણ ન આવે. અમિતાભ અને (હવે તો સ્વ.) મૂકેશ અગરવાલે ભેગા મળીને એબીસીએલ જેવી કંપની શરૂ કરી હોત તેવું માનવામાં આવે? પરંતુ આજના સમયની આ હકીકત છે. હવે પ્રેમમાં વિચ્છેદ થયા પછી પણ સારા સંબંધો જળવાઈ રહે છે. સલમાન ખાનના સંગીતા બિજલાણી સાથેના સંબંધો આ વાતનો વધુ એક પુરાવો છે.

ઠીક છે. ઉપરના સમાચારે બીજી જે રીતે ધ્યાન ખેંચ્યું તે એ કે વધુ એક ચેનલ શરૂ થઈ રહી છે. હજુ હમણાં તો ઝી એન્ટરટેઇનમેન્ટ લિમિટેડની ‘એન્ડ’ ટીવી શરૂ થયાના સમાચાર આવ્યા હતા. તે પહેલાં સોની ટીવીની ‘પલ’, કલર્સની ‘રિશ્તે’, ઝી ટીવીની ‘ઝિંદગી’ શરૂ થઈ હતી. કોઈ મનોરંજન ચેનલ શરૂ હોય અને તેના માલિક રમતગમતની ચેનલ શરૂ કરવા વિચારે તે સમજાય, પરંતુ ઝી ટીવી આવતું હોય અને ઝિંદગી ચાલુ થાય, કે પછી, ઝી સિનેમા પર ફિલ્મો બતાવાતી હોય અને તે જ કંપનીવાળા એન્ડ પિક્ચર્સ પણ શરૂ કરે તો સહેજે પ્રશ્ન થાય કે પોતાની ચેનલ જેવા કાર્યક્રમો આપે છે તેવા જ કાર્યક્રમો આપતી બીજી ચેનલ શરૂ કેમ કરે છે? આ લોકો ગાંડા તો નથી થઈ ગયા ને?

ના. આ બધા ઉદ્યોગપતિઓ છે અને તેઓ જે કંઈ કરતા હોય તે સમજીવિચારીને, ૧૦૦-૨૦૦ કરોડ મળતા હોય તો જ નવું સાહસ શરૂ કરવાનું વિચારે (હવે એમ તો કહેવાય નહીં કે બે પૈસા મળતા હોય તો શરૂ કરે, ૧૦૦-૨૦૦ કરોડ જ કહેવું પડે). પહેલાં તો એવું હતું કે કાર્ટૂન જોવું હોય તો રવિવારે મિકી એન્ડ ડોનાલ્ડ જોઈ લેવાનું. અંગ્રેજી સિરિયલ જોવી હોય તો રવિવારે સ્ટાર ટ્રેક જોઈ લેવાની. ફિલ્મ જોવી હોય તો શનિવારે અને રવિવારે ટીવી સામે બેસી જવાનું. ગીતો જોવાં હોય તો બુધવારે અને શુક્રવારે રાત્રે ૮ વાગ્યે ટીવી પર ચિત્રહાર જોઈ લેવાનું.. સમાચાર જોવા હોય તો રાત્રે ૮.૪૦એ દૂરદર્શન શરૂ કરવાનું. જી હા, પહેલાં એક જ ચેનલ હતી, દૂરદર્શન. તેમાં તમામ પ્રકારના કાર્યક્રમો આવતા, સમાચાર, ક્રિકેટ મેચ, ઓલિમ્પિક, કાર્ટૂન, હિન્દી ફિલ્મ ગીતો, ક્લાસિકલ મ્યૂઝિક, ક્લાસિકલ ડાન્સ અને ફિલ્મો. અને દૂરદર્શનનો પ્રસારણ સમય હતો સાંજે ૬ કે ૭ વાગ્યે શરૂ થાય અને રાતના ૧૧ વાગ્યા સુધી જ ચાલે. પરંતુ સૃષ્ટિનો ક્રમ છે, એકમાંથી વિસ્તરવાનું. હિન્દુ સંસ્કૃતિ મુજબ પહેલાં મનુ અને શતરૂપા તેમજ બ્રહ્માના માનસપુત્રો સમા વિવિધ ઋષિઓ થયા તેમાંથી સૃષ્ટિનો વિસ્તાર થયો. તેવું દૂરદર્શનમાંથી પણ થયું. દૂરદર્શનની મેટ્રો ચેનલ આવી. ખાનગી ચેનલોમાં ઝી અને સ્ટાર ટીવી આવ્યાં. સ્ટાર પર અંગ્રેજી સિરિયલ આવતી. ધીમે ધીમે હિન્દી સિરિયલ ચાલુ થઈ. તેમાંથી વિસ્તરીને ‘સ્ટાર પ્લસ’ થયું. સ્ટાર પ્લસનું વિસ્તરણ થઈને સ્ટાર વન ચેનલ આવી. જે બાદમાં લાઇફ ઓકે બની. ‘ઝી’એ પણ એક ‘એલ ટીવી’ નામની ચેનલ શરૂ કરી હતી, જે બંધ કરી દેવાઈ. પણ હવે તો આખો નવો જ ટ્રેન્ડ ચાલુ થયો છે. એક સરખી શ્રેણીમાં આવતા કાર્યક્રમો આપતી બીજી ચેનલ શરૂ કરવાનો.

આપણે ટેલિવિઝન ઇન્ડસ્ટ્રીની ભાષામાં સમજીએ. તમે જે સ્ટાર પ્લસ, ઝી ટીવી, સોની ટીવી, કલર્સ ટીવી જુઓ છો તેને જીઇસી એટલે કે જનરલ એન્ટરટેઇનમેન્ટ ચેનલ કહેવાય છે. આજતક, એબીપી, એનડીટીવી વગેરે સમાચાર ચેનલો છે. ટેન સ્પોર્ટ્સ, સ્ટાર સ્પોર્ટ્સ, ઇએસપીએન વગેરે સ્પોર્ટ્સ ચેનલ છે. આમ, જે તે વિષયની ખાસ ચેનલો આવવા લાગી. કાળક્રમે તેમાંય વધુ વર્ગીકરણ થયું જેમ કે સ્ટાર સ્પોર્ટ્સ તો હતી જ, પરંતુ માત્ર ક્રિકેટને ધ્યાનમાં રાખીને સ્ટાર ગ્રૂપે સ્ટાર ક્રિકેટ ચાલુ કર્યું. અગાઉ સ્ટાર પ્લસ પર સુંદર અભિનેત્રી દીપ્તિ ભટનાગર વિવિધ શહેરોની મુસાફરી ‘યાત્રા’ નામના કાર્યક્રમ દ્વારા કરાવતી. ત્યારે કદાચ કલ્પના પણ નહીં હોય કે માત્ર ટ્રાવેલ્સની પણ એક ચેનલ હોઈ શકે છે. સંજીવ કપૂરનો ઝી ટીવી પર ‘ખાના ખજાના’ શો આવતો ત્યારે કોઈએ વિચાર્યું હશે કે ઘણી બધી ચેનલો પર માત્ર ખાણી પીણીને લગતા કાર્યક્રમો જ બતાવાતા હશે? હવે આનાથી પણ વધુ એક પગલું આગળ જઈને એવો ટ્રેન્ડ આવ્યો કે જીઇસીમાં પોતાની એક ચેનલ તો હોય જ, પરંતુ બીજી ચેનલ પણ શરૂ કરવી, જેમ કે, સ્ટાર પ્લસ છે તેણે ‘લાઇફ ઓકે’ શરૂ કરી. સોની ટીવીની સોની અને સબ ચેનલ છે, છતાં તેણે ‘પલ’ ચાલુ કરી. ઝી ગ્રૂપની ‘ઝી’ ટીવી ઉપરાંત ‘ઝિંદગી’ તો હતી જ, હવે ‘એન્ડ ટીવી’ આવી.

પ્રશ્ન એ થાય કે એક સરખા કાર્યક્રમો, જેને ટેલિવિઝનની ભાષામાં કન્ટેન્ટ કહે છે, બતાવતી બે ચેનલો હોય તો ટીઆરપી તેમજ જાહેરખબર માટે ઝઘડો ન થાય? વળી, કાર્યક્રમો ખરીદવા માટેના ખર્ચ, તે બતાવવાનો ખર્ચ…આ બધું કેવી રીતે પોસાય? આનો જવાબ એ છે કે, અત્યારે ભારતનું બજાર પણ વિસ્તરી રહ્યું છે. ૧૯૯૧માં તત્કાલીન નાણા પ્રધાન મનમોહનસિંહે જે ઉદાર આર્થિક નીતિ અપનાવી તે પછી આ બધો ઘટનાક્રમ સર્જાયો છે. ટીવી ચેનલો, ઇન્ટરનેટ, મોબાઇલ આ બધાની અસરના કારણે ભારતીયો વધુ ખર્ચ કરતા થયા છે. ઉપભોક્તાવાદ વધ્યો છે. આ પેલી સર્ક્યુલર બસ જેવું છે. જાહેરખબરો બતાવાય છે એટલે ગ્રાહકો ખરીદવા આકર્ષાય છે અને ગ્રાહકો ખરીદવા આકર્ષાય છે તેથી જાહેરખબરો વધે છે. જાહેરખબરોનું પ્રમાણ વધે છે પરિણામે ટીવી ચેનલોનું પ્રમાણેય વધે છે. વળી, જાહેરખબર મેળવવા માટે જો પોતાની કંપનીની અનેક ચેનલ હોય તો કંપનીના માર્કેટિંગ મેનેજેરો એવો દાવો કરી શકે કે અમારી પહોંચ કરોડો દર્શકો સુધી છે. સરવાળે, તેની બે અથવા જેટલી ચેનલો હોય તે બધાને જાહેરખબરો મળે. આ ઉપરાંત દરેક વર્ષે કોઈને કોઈ રાજ્યમાં ચૂંટણી તો હોય જ છે. અને રાજકીય પક્ષો પોતાની જાહેરખબર કરવા માટે આ બધી ચેનલ પર કટકો બટકું નાખી દેતા હોય છે. લોકસભાની ચૂંટણી વખતે કેટલી બધી જાહેરખબરો આવતી હતી, તે તો, તાજો ઇતિહાસ હોવાથી, તમને યાદ જ હશે. આથી કીડીને કણ મળી રહે છે અને હાથીને મણ.

બીજું, સામાન્ય રીતે એવું કરાય છે કે જે મુખ્ય ચેનલ હોય તેના પર જે શો પૂરા થઈ ગયા હોય અથવા તો તેના જૂના એપિસોડ હોય તે આ બીજી ચેનલ પર દર્શાવાય છે. દાખલા તરીકે ‘પલ’ ચેનલ પર સાંજે ૬થી ૯ સુધી સબ ટીવીના જૂના શો ‘એફઆઈઆર’, ‘લાપતાગંજ’, ‘રિંગ રોંગ રિંગ’ વગેરે બતાવાય છે. રાતના ૯ પછી સોની ટીવીના શો જેમ કે ‘બડે અચ્છે લગતે હૈ’, ‘પરવરિશ’ વગેરે બતાવાય છે. ઘણા ટીવી દર્શકોને જૂના શો જોવા ગમતા હોય છે. તેઓ પૂરી થઈ ગયેલી તેમની મનગમતી સિરિયલ જોવા આ નવી ચેનલ તરફ વળી શકે છે.

ત્રીજું, હવે જનરલ એન્ટરટેઇનમેન્ટમાં પણ વર્ગીકરણ કરી દેવામાં આવે છે, જેમ કે, ‘ઝી’ ટીવી પર બધી પ્રકારના કાર્યક્રમો આવતા હોય તો ‘ઝિંદગી’ પર પાકિસ્તાનના શો આવે છે, જે સ્વાભાવિક રીતે મુસ્લિમ લોકોને તેના તરફ આકર્ષશે. તો ‘એન્ડ ટીવી’ પ્રમાણમાં યુવાન, શહેરી અને આધુનિક માનસિકતાવાળા લોકો માટે છે. આ જ રીતે ‘સ્ટાર પ્લસ’ પર સામાન્ય રીતે મહિલા લક્ષી સિરિયલો આવતી હોય છે જ્યારે ‘લાઇફ ઓકે’ પર ક્રાઇમ આધારિત કાર્યક્રમો વધુ છે. અગાઉ એનડીટીવી ઇમેજિન, નાઇન એક્સ જેવી ચેનલો આવેલી પરંતુ તેમણે કંઈક અલગ કરવાના બદલે સ્થાપિત ચેનલો જેવા જ કાર્યક્રમો આપવાની હોડ બકી અને તેમને સમેટી લેવી પડી.

ચોથું, બેએક વર્ષથી આપણે ત્યાં ટીવીનું ડિજિટલાઇઝેશન શરૂ થયું. અમદાવાદ સહિતના શહેરોમાં સેટ ટોપ બૉક્સ (ડીટીએચ) ફરજિયાત કરી દેવાયું. આનાથી કેબલ ઓપરેટરોની દાદાગીરી ઘટી. પહેલાં તો નવી ચેનલ જે તે શહેરના વર્ચસ્વ ધરાવતા કેબલ ઓપરેટર દેખાડે તે માટે તેને કરોડો રૂપિયાનો ચાંદલો કરવો પડતો, હવે સેટ ટોપ બૉક્સ આવ્યા પછી આ પ્રથા સાવ બંધ નથી થઈ પરંતુ તેમાં ભાવ ઘટ્યા છે.

પાંચમું, ટીવી ધરાવનારા લોકો હવે વધી રહ્યા છે. અત્યારે, એક અંદાજ પ્રમાણે, ટીવી કેબલ કે ડીટીએચ દ્વારા ૧૩.૯ કરોડ ઘરમાં છે. ઈ.સ. ૨૦૧૮માં ટીવી ૧૮ કરોડ ઘરમાં પહોંચે તેવી ધારણા છે. આ ઉપરાંત હવે ચેનલોની વિવિધતા વધવાના કારણે એક જ ઘરમાં લોકો વચ્ચે ટીવી પર કઈ ચેનલ જોવી તે માટે ઝઘડા થવા લાગ્યા છે. આના ઉપાય તરીકે પોસાય તેવા લોકો ઘરમાં બે કે ત્રણ ટીવી પણ રાખવા લાગ્યા છે!

એટલે મૂળ તો, આ બધો તાયફો મારા ને તમારા ખભે છે. જાહેરખબરો કરનારી કંપનીઓ પણ જાહેરખબરોનો ખર્ચ પ્રોડક્ટના ભાવ વધારીને આપણી પાસેથી લેવાની. ડીટીએચમાં પણ તમારે અમુક ચેનલો જોવી હશે તો વધુ રૂપિયાવાળું પેકેજ લેવું પડશે. તેમાંય સ્ટાર સ્પોર્ટ્સ  જેવી પે ચેનલ જો વિશ્વ કપના ટાણે ભાવ વધારી દે તો તમારા પેકેજના ખર્ચમાં પણ વધારો થવાનો. વળી, ચેનલો વધશે એટલે ઉપર કહ્યું તેમ ઘરમાં એકથી વધુ ટીવી પણ આવવાના. જ્યાં સુધી ભારતીય બજાર વિસ્તરતું રહેશે, લોકોની ખરીદશક્તિ વધતી રહેશે અથવા લોકોની ખરીદવાની ઈચ્છા વધતી રહેશે ત્યાં સુધી હજુ વધુ ચેનલો આવતી રહેશે.

(ગુજરાત ગાર્ડિયનની ફિલ્મ પૂર્તિમાં ‘ટેલિ ટોક’ કૉલમમાં તા.૧૩/૩/૧૫ના રોજ આ લેખ છપાયો)